Студентларны яңа бүлмәләр көтә

(Тәтеш, 16 ноябрь, “Тәтеш таңнары”). Безнең хәбәрчеләр авыл хуҗалыгы техникумының тулай торак ­бинасында булдылар һәм андагы сту­дентларның яшәү шартлары ничек үзгәрүен күреп кайттылар. 

– Тулай торак 288 студентка исәпләнгән, – дип уртаклашты директор Илнур Җамалтдинов. – Түбәсе инде ябылды, яңа пластик тәрәзәләр куелды, җылылык, су агу системалары, электр җайланмалары алыштырылды, гадәттән тыш хәл вакытында хәбәр итү сис­темалары яңартылды. 

Бинага керү юлында  контроль-кертү пункты бар, анда каравылчы студент билетларын тикшерә, тимер эзләгеч кыса урнаштырылган, укучылар икенче аяк киемен алыштырып кияләр. Тулай торак коменданты Галина Гатауллина студентлар чисталык һәм тәртипне үтиләр, дип билгеләп үтте. Сүз уңаеннан, алар әлегә бинаның ремонтланмаган өлешендә  яшиләр, әмма тиздән аларны яңа бүлмәләр көтә. 

Яңартылган ­катларда 16 блок урнашкан, анда якты һәм иркен, кори­дорларның һәркайсының үз матурлыгы, ­кызлар яшәгәне алсу төстә, егет­ләр яшәгән урын зәң­гәр төскә буялган. 

Һәрбер катта кер юу бүлмәләре бар, алар да шулай ук якты төсләр белән балкый, аларда автомат кер юу машиналары урнаштырылачак. Без кранны ачып карадык, суның басымы яхшы.   

Шулай ук аш-су бүлмәсе дә бар, анда кирәкле җай­ланмалар, көнкүреш техникалары урнаштыру планлаштырыла. Укучыларга ял итү бүлмәсендә аралашырга, телевизор карарга, өстәл уеннары уйнарга мөмкин булачак.   

Тулай торакта без уку ал­дын­гылары, ­техникум активистлары Никита Шад­рин һәм Александр ­Лихоманов белән әңгәмә кордык. 

– Без үзебез Буадан. Укырга килгәч, безгә тулай торактан урын бирделәр, хәтта бер бүлмәдә яшибез. Монда инде без өченче ел торабыз, безгә барысы да ошый. Бинага ремонт ясый башлагач, без яңа бүлмәдә яшәп калырга туры килүенә шатландык. Әзер биналарны инде карап чыктык. Алар шундый якты, җылы, иркен, уңайлы. Санузелда душ та, киемнәр киптергеч тә бар, бу да бик мөһим. Безне бер төркемдәгеләр белән бер блокка кертү теләгебезне белдердек, – диделәр алар.  

Тулай торакның котельнясы да яңартылган, педагоглар һәм студентлар билгеләп үткәнчә, аның нәтиҗәсендә биналар җы­лына төшкән. 

– Капиталь ремонт ясадык, өйдәге кебек чиста, – диде газ котельнясы операторы Рәис Сәмерханов. – Барлык җайланмалар да яңа, өч казан бар, элек басым җитми иде, ә хәзер аларның куәте арттырылды, барысы да җайга салынды. Җайланма өзек­лексез эшли. 
Илнур Җамалтдинов әйтүенчә, тулай торак бинасының быелга планлаштырылган капиталь ремонт эшләренең күләме  үтәлгән.