Күп балалы ана булу җиңелме икән?

(Тәтеш, 8 март, “Тәтеш таңнары”). Сазоновлар йорты – чын-чынлап ир-егетләр патшалыгы, чөнки Алев­тина ире Сергей бе­лән бергә өч бала: Маркел, Иван һәм Арсенийны тәрбиялиләр. Хуҗабикә үзе дә күп балалы гаиләдә үскән, әмма күп балалы ана булырмын дип беркайчан да уйламаган булган.

– Өченче баланы көт­кәндә УЗИга олы улларым бе­лән бардым. Дөресен генә әйт­кәндә, кыз булыр дип уйладым, ә табиб: “Малай көте­гез”, – дип әйтте. Минем өчен дә, балаларым өчен дә бу хәбәр көтелмәгәнчәрәк булды, – дип сөйли Алевтина.

Аның әйтүенчә, балалар тышкы кыяфәтләре һәм холыклары белән дә төрлесе төрлечә. Малайлар арасында бәхәсләр дә булгалый, ләкин бернинди дә көнләшү юк. 

Алевтина иртә белән башта ирен эшкә озата, аннары өлкән уллары Маркел белән Иван мәктәп автобусына чыгып китәләр – алар Килдеш мәктәбендә укыйлар. Эш көннәрендә күп балалы ана өйдә 5 яшьлек улы Арсений белән кала. Аш-су әзерләү, җыештыру, хуҗалык эшләре белән шөгыльләнә, күптән түгел  йортларын ремонтлауны тәмам­лаганнар. Шулай булгач мәшәкатьләр җитәр­лек. Бәйрәмнәрдә Са­зо­но­вларның йортларына туганнары бик күп кайталар. 

Алевтина үзенең өй­дә­геләрен тәмле камыр ризыклары пешереп сөен­дерергә тырыша. Аның пироглары телең йотарлык була! Уллары белән бергә вафля дә пешерәләр, шулай да ир-егетләр ир-егет­ләр шул инде,  шуңа да алар ит белән пешерелгән камыр ризыкларын һәм ашларны өстенрәк күрәләр.  

Халыкара хатын-кызлар кө­нендә Алевтинаны яраткан ир-егетләреннән берь­юлы дүрт бүләк көтә, шулай да иң яхшы бүләк – ул аның зур һәм тату гаиләсе!

фото: Сазоновлар гаилә архивыннан