Шәһәрнең төп чыршысын ачу хөрмәтенә бәйрәм оештырылды

(Тәтеш, 15 декабрь, “Тәтеш таңнары”). Матур гадәт буенча, бәйрәм җитәргә берничә көн кала, район мәдәният йорты каршындагы  мәйданда шәһәрнең төп чыршысын ачу хөрмәтенә бәйрәм оештырылды. 

“Киләсе ел сезнең һәр­кай­сыгыз өчен әйбәт булсын, бары тик шатлык­лы вакыйгалар гына алып килсен. Яхшы бил­ге­лә­ре­нә укыгыз. Алда сез­не ка­никул көтә, күңелле ял итегез. Бүген без шә­һә­рнең төп чыршысында утлар кабынсын өчен җыелдык”, – дип мөрәҗәгать итте балаларга район ­башлыгы Рәмис Сафиуллов. Һәм “Чыршыкай, кабын!” ди­­гән күмәк ­тавышка гүзәл чыршы төрле утлар балкышы ­бе­лән җе­мелдәп яна башлады.

Өстәмә белем бирү үзәге коллективы балалар өчен театральләштерелгән кү­ренеш әзерләгән, Кыш бабай, Кар кызы, Кар малае һәм башка тылсымлы геройлар анда шаярдылар, күңелле тамашалар күрсәттеләр. Балалар алар белән бергә әкият иленә сәяхәткә бардылар, җырладылар, биеделәр, бүләкләргә сөенделәр. Тамаша ахырына якынлашса да яшь тәтешлеләр һәм аларның ата-аналары өйләренә таралашырга ашыкмады, алар бәйрәм рухын мөмкин кадәр озаг­рак дәвам итәргә тырыштылар. Чөнки район мәдәният йорты каршындагы мәйданда караңгы төшүгә үк әкияти карета, күңелле Кар малайлары, Кыш бабай һәм Кар кызы төрле утлар белән балкып, тирә-якка гаҗәеп матурлык сирпеп торалар.