Тәтештә олимпиадаларда катнашучыларны хөрмәтләделәр

(Тәтеш, 24 март, «Тәтеш таңнары», Елена Викторова, автор фотосы). Районда укучыларны – Бөтенроссия фән олимпиадаларының йомгаклау һәм төбәк этаплары призерларын һәм аларның педагогларын бүләкләделәр.

2021 елда Тәтеш ­районы уку йортлары укучылары олим­пиадаларның йомгак­лау һәм төбәк этапларында 25 призлы урын яуладылар (узган ел – 11).

Тәтештәге 1нче, 2нче мәк­тәпләр, татар мәктәбе, кадет интернат-мәктәбе, Алабирде, Олы Тархан, Киртәле, Тоншерма мәктәпләре укучылары югары нәтиҗәләр күрсәттеләр.
Бүләкләү тантанасы Тәтеш районы башлыгы Рәмис Сафиуллов катнашында өстәмә белем бирү үзәгендә узды.

– Татарстанда белем бирү сыйфаты Россиянең башка төбәкләренә караганда югарырак. Бу сезгә югары нәтиҗәләргә ирешү мөмкинлеге бирә. Тырышып эшләгез һәм бирешмәгез. Укытучылар һәм ­ата-аналар ярдәме белән сезнең барысы да яхшы булачак, – дип мөрәҗәгать итте Рәмис ­Хатыйп улы ­балаларга.

Тәтеш татар мәктәбенең 10нчы сыйныф укучысы Гөлназ Гыймадиева – биология буенча Бөтенрос­сия олимпиадасының төбәк этабы призеры. Кызны укытучы ­Гөл­фия Хөснетдинова әзерләгән.

– Бүгенге кебек бү­ләкләү тантаналары бик мөһим. Алар балаларга зур этәргеч бирә, алар үзләрен йолдызчыклар итеп тоя­лар, – диде Гөлфия Мәҗит кызы.

Олы Тархан мәктәбенең 10нчы сыйныф укучысы Илмир Чумарин – татар теле буенча респуб­лика олимпиадасының йомгак­лау этабы призеры.

– Миңа әзерләнергә укытучы Зөлфия Дамировна Маштыева булышты. Мондый дәрәҗәдә­ге олимпиадада беренче тап­кыр җиңдем, шулай ук олим­пиадаларның муниципаль этап­ларында да уңышларым булды. Мондый тантаналы чаралардан соң тырышып укыйсы һәм җиңүләргә ирешәсе килә, – дип уртак­лашты Илмир.

Тәтеш районы башлыгы Рәмис Сафиулловтан мәктәп укучылары бүләкләр алдылар, аларның остазлары – акчалата премияләр. 

Балалар һәм укытучылар район башлыгының Рәхмәте белән бүләкләнделәр.