Физкультурник көненә Татьяна янында очрашалар

(Тәтеш, 26 февраль, “Тәтеш таңнары”, Лина Тихонова).
Шәһәрле Татьяна Казанская­ның кызы Ирина Пустолякова җибәргән фотосурәт бәйгедә 122 тавыш җыеп, җиңүгә иреште. “Искиткеч әби һәм апа, дөньядагы иң яхшы әни”, – дип язган ул безгә.

Без язма героебызны редакция­гә чакырдык һәм аның белән ­аралаштык. 

– Татьяна көнендә мин туганнарымнан һәм танышларымнан бик күп котлаулар алам, – дип уртаклашты ул. – Бу Студентлар көне дә булгач, яшьлек елларын да, үземнең төркемдәшләремне дә сагынып искә алам. Мин Тәтештәге педагогика училищесын, физкультура бүлеген тәмамладым. Барысы да мавыктыргыч булды, укытучылар шундый әйбәтләр иде, төрле бик күп чаралар уздырылды. Училищены тәмамлаганга киләсе елга инде 45 ел була, без ел саен августта, Физкультурник көнендә очрашабыз. Кемнең мөмкинлеге була, барысы да миңа киләләр, без якын кешеләргә әйләндек. 

Татьяна Николаевна һөнәре буенча эшләмәсә дә, нигездә бухгалтер булып хезмәт куйган, спорт­ны гомере буе яраткан. Җиңел атлетика буенча спорт мастеры кандидаты лаеклы ялда булса да, көмеш яшьтәге кешеләр өчен  “Сәламәтлек” төркеменә йөри, ахирәте Надежда белән көн саен танылган баскыч буйлап Иделгә саф һава суларга бара, физик активлык теләсә кайсы яшьтә дә кирәк, дип саный. Хатын-кызга музыка иҗаты да якын, ветераннарның халык хорында бик теләп җырлый, ул шулай ук анда катнашучылар белән бергә  безнең сугышчыларга яшеренү челтәрләре үрү белән шөгыльләнә. 

Шәһәрле ике бала тәрбияләп үстергән, өч оныгына сөенә. 

– Алар минем молодецлар, яхшы укыйлар, – диде горурланып әби. – Әле тагын алар спорт­ны да яраталар: Семен хоккей белән шөгыльләнә, Даша стендка ату мәктәбенә йөри, кечкенәсе Ева гимнастиканы үз итә.

Тәтешле холкына исеме тәэсир итәме икән дигән сорауга, үз исемем миңа ошый дип ышанычлы итеп җавап бирде. 

– Мин “Авангард”та конкурста катнашырмын дип уйлап та карамадым, – дип уртаклашты Тать­яна Николаевна. – Миңа бу хакта әйткәч, бик гаҗәпләндем, минем өчен шулкадәрле кеше тавыш биргәненә тагын да ныграк гаҗәпләндем. Көтелмәгән шатлык, мине хуплаган һәркемгә рәхмәтлемен. 

“Кодрәтле, максатчан, кызыксынучан, яхшы хуҗабикә, туганнарын хөрмәтли, алар өчен үзен дә аямаска әзер, дуслаша белә, теләсә нинди хәлдә ярдәмгә килә”, – дигән яхшы сыйфатларын укыйбыз Татьяна исеменә ия кеше турында без, һәм аның белән берникадәр аралашкач, аның конкурсыбыз җиңүчесе өчен бик тә туры килүе белән ризалашабыз. 

фотоны Ирина Пустолякова тәкъдим итте