Әлифбам – тел ачкычым

(Тәтеш, 3 март, “Тәтеш таңнары”).

– Татарстаныбызда 2023 елда ­Милли мәдә­ниятләр һәм гореф-гадәтләр елы игълан ителде. Бу юнәлештә мәктәбебез татар хал­кының гореф-гадәтләрен, йолаларын, киемнәрен, онытылып барган уеннарын киләчәк буынга җиткерү буенча зур эш алып бара. Мәктәпне гөрләтеп, Әлифба бәй­рәме узды. Беренче сыйныф укучылары: Сәйдә ­Гафиятуллина, Рәдис Миңнуллин, ­Риана Фәй­зуллина, ­Шамил Хә­митов, Айгизә Шәй­хет­динова милли кием­нәр киеп, халкыбыз көе астында сыйныф бүл­мәсенә үттеләр. Балалар Әлифба китабы­ның тирән мәгънәле, бәһасез байлык булуын аңлыйлар. Ә Әлифба бәйрәме – һәммәбез өчен дә зур тантана булып тора. Беренче сыйныфлар бу көнне матур итеп шигырьләр сөйләделәр, әти-әниләренә үз куллары белән ясаган бү­ләкләрен тапшырдылар. Ямьле итеп би­зәлгән сыйныф бүл­мәсенә кунакка Әлифба (Әминә Хәмитова), Татар теле (Зилә Шакирова), Әдәби уку (Снежана Кәбирова), Азбука (Илсаф Сәйфуллин) килде, – дип яза мөгаллимә Гүзәлия Нурулла кызы. – Укучыларга  бәйрәмдә бик күп матур теләкләр әйтел­де. Әлифба бәйрәменә кил­гән ата-аналар да балаларының  чыгышларын зур дулкынлану һәм горурлык хисләре белән тыңлап утырдылар. Беренчеләрнең сыйныф җитәкчесе Фирдания Миннуллина, мәктәп мөдире Нурфия Нәфигыйна, математика укытучысы Гөлнур Вәлиева һәм әти-әниләр балаларны тәбрикләп, истәлекле бүләкләр дә тапшырдылар. Бәйрәм күмәкләшеп “Туган тел” җырын башкару белән тәмамланды. Мәктәпнең аш пешерүчесе Асия Хәйрет­динова укучыларны милли ризыклар белән сыйлап сөендерде. Бәйрәм рухы чәй өстәле янында дәвам итте. Аңардан бик матур һәм сагынып сөйләрлек хис-ки­черешләр уелып калды!

фотоны Гүзәлия Гафиятуллина тәкъдим итте