Хат ташучыларның каникуллары юк

2015 елның икенче яр­ты еллыгына язылу кампания­се яңа гына тәмамланды һәм хат ташучылар башкарылган эш­ләре тәэсирләреннән әле арынып өлгермә­деләр. Катлаулы, авыр булды. Үтенделәр, бәхәс­ләштеләр, килештеләр, үпкәләштеләр, сө­е­неш­те­ләр. Барсы да те­лә­гәнчә барып чыкмады, әмма моның объектив сә­бәпләре бар. Иң яратып укыла торган район "Тәтеш таңнары" ("Авангард") газетасына беренче ярты еллык белән чагыштырганда укучыларыбызның 90 проценты язылды - 4555 данә.

Удельное Нечасово (110 про­цент), Пролей-Каша (106), Алекина Поляна­ (105), Килдеш (103), Кир­тәле (103), Льяш (101), Урюм (100) элемтә бүлекләре хезмәткәрлә­ре халык белән уртак тел таба алдылар. Аларга авыл хуҗалыгы предприятиеләре җитәкчеләре Римма Сафиуллова, Вик­тор Абрамов, Юрий Жугарев, Сергей Казаков, Әсфан Йосыпов, тыл эшчәннәренә, мәгариф һәм мәдәният учреждениеләре хезмәткәрлә­ренә район газетасын яздырып бүләк иткән эшкуар Володар Тимофеев та булышлык күрсәтте. Жуково (97), Чинчурино (94), Зур Әтрәч (93), Олы Шәмәк (92) элемтә бүлекләре хат ташучылары да заданиеләрен үтәүгә якынлаштылар. 2187 данә яздырган шәһәр хат ташучылары­на да рәхмәт. Журналистлар хат ташучыларның тырышлыгы белән, хәзер газетага яздырып, август­тан тиражны арттырырга мөмкин булыр дип ышаналар.

Авыл проблемаларын хәл итү бүген күп яктан хат ташучыларга бәйле. Ул газета, хатлар гына китереп калмый, ТКХ, салымнар буенча квитанцияләрне дә түли, элемтә бүлекчәсендә беренчел кирәкле товарларны да сатып алырга мөмкин. Поч­тада эшләүчеләр өлкәннәр өчен әле бик әйбәт гәптәшләр дә.

Районның барлык почта хезмәткәрләрен һөнәри бәйрәмнәре белән котлап, без киләчәктә дә нәтиҗәле хезмәттәшлеккә исәп тотабыз. Безнең максатыбыз да уртак - якташларыбызга хезмәт итү.