5 октябрь – Укытучылар көне.
Татьяна Иванова, Тәтештәге авыл хуҗалыгы техникумы укытучысы:
– Мәктәптә укыткан педагогларым үрнәгендә мин укытучы булырга уйлаганмындыр, мөгаен. Башта безнең педучилищены тәмамладым, аннары укуымны институтта дәвам иттем, өстәвенә, чит телләр факультетында. Шәһәрдәге 1 нче мәктәптә эшләдем, ә инде авыл хуҗалыгы техникумына белгеч кирәк булганлыктан шунда чакыргач, ризалаштым, һәм менә 30 елга якын биредә эшлим. Яңадан квалификация үтеп, хәзер инде рус теле һәм әдәбияты укытам. Үзем укырга яратам һәм студентларга да укуга мәхәббәт уятам. Минем һөнәрем – кешелекле һәм игелекле. Дәресләрдә әсәрләр укып, без сөйләмне үстерәбез, фикер алышабыз, язма геройларының гамәлләрен күздән кичерәбез, әдәбияттагы вәзгыятьнең хәзерге чынбарлыкка җайлашуы барлыкка килә. Бу мавыктыргыч.
Уку белемлелекнең артуы белән тыгыз бәйләнгән, бу, һичшиксез, һәр белемле кеше өчен мөһим. Белем бирү барышы тәрбия белән тыгыз бәйләнгән, һәм бу һәр дәрестә тормышка ашырыла. Моннан тыш, минем һәрвакытта сыйныф җитәкчелегем бар иде. Бүгенге балалар аралашуда аеруча да иркенрәк тота, үз тормышларында киләчәккә максатчанрак була башладылар. Әмма вакыт ничек кенә үзгәрмәсен, педагоглар дәрестә дә, дәрестән тыш вакытта да үзләренең укучыларын һәрчак эш сөючән, намуслы, үз гамәлләре өчен җаваплы кешеләр булырга һәм, әлбәттә, үз Ватанының патриотлары булырга өйрәтәләр. Мин үз һөнәремне яратам, һәм аңа хезмәт куйган бөтен гомерем буена тугры булып калам, чөнки яшь буынны тәрбияләп, без илебезнең киләчәген булдырабыз.
Нет комментариев