Җыр күңелне яшәртә

(Тәтеш, 8 февраль, «Тәтеш таннары», Мәдинә ИБӘТУЛЛИНА (автор фотосы)). Сергей Ерастов күп еллар дәвамында без­­не, үзенең тамашачыларын, иҗаты бе­лән сөендереп яши. Һәм аның кабат­ланмас, аһәңле тавышыннан башка бер генә чараны да күз алдына китереп булмый. Аның хакында еш кына профессионалмы соң ул, дип сорыйлар: “Мин гади слесарь, хәтта музыка өлкәсендәге белемем дә юк. 3-4 яшьлек чагымдагы кулыма гармун тотып төшкән фото­рәсемем сак­ланган, – ди җыр­чы. – Безнең авылда һәркем җыр­лый, аеруча да әбиләр, кичләрен нигезгә тезелеп утыралар да бертавыштан, искиткеч итеп көй сузалар иде”.

Башлангыч сыйныф­ларда кулына баян ала һәм аңарда мөс­тәкыйль рәвештә уйнарга өйрәнә. Соңрак беренче гита­расы да барлыкка килә, әлеге уен коралында ул бер кинофильмдагы җыр­га музыка сайлап ала. Шәһәрдәге 2нче урта мәктәпнең 9нчы сый­ныфында укыган вакытта яңа ел чарасында җыр башкара, бу “Кыр чәчәкләре” мәктәп ан­­самбле сос­тавына керү өчен юллама була. Әмма шулай да, Сергей Николаевич үзенең җырчылык кү­тәреле­шен Мария Хонина җитәкчелегендәге “Каты каеннар” балалар ансамблендә катнашып, авыл сәхнәсендә баш­ланып китүен елмаеп искә ала. Квартет Ленин урамындагы мәдәният йортында да уңышлы чыгыш ясый. Беренче нотадан ук һәр җирдә алкышлап каршылыйлар. Хәер, бүген дә Сергей Ерас­­товның чыгышлары көчле алкышлардан баш­ка үтми.

Тормыш юлының аг­­ы­­шы, һәрбер ир-­егетнекенә охшаш: уку, армиядә хезмәт итү, эш, гаилә, балалар, оныклар. “Никадәр җырлар башкарылды, ничаклы сәх­нәләрдә чыгыш ясарга туры килде – санап та бетерерлек түгел. 80нче еллардагы җырлар аеруча да йөрәккә якын. Бер мизгелдә онытыла торганнар түгел, киң кырлылар, тирән мәгъ­нәгә ияләр”, – ди халык җырчысы.

Сергейны белгән һәр­кем аның талантлы булуы белән бергә, шулай ук шәхси сыйфатларын – “киң күңелле, намуслы, гаҗәеп күркәм кеше икәнлеген тасвирлыйлар”, – диләр алар.

“Кешеләргә шатлык бүләк итү миңа ошый, күрәсең тормыштагы язмышым да шушыдыр! Җыр күңелне яшәртә. Чын йөрәктән һәм ихлас күңелдән җыр­лыйм!” – дип уртак­лаша Сергей Николаевич. Якташыбызның әле тагын бер хыялы бар, Тәтешкә танылган “Зәңгәр кош” ансамблен чакыру һәм Иделнең биек ярында алар белән бергә җырлау. Ниндине? – дип кызыксынырсыз сез. Сергей алар коллективының бөтен репертуарын яттан белә. Хыяллары тормышка ашсын иде!