Газетаны һәрчак көтеп ала

Дамир Хөснетдинов, пенсионер, Тәтеш:

– Мин “Авангард”  район газетасыннан инде 30 елга якын аерылмыйм, киләсе яртыеллыкка да абунә рәсмиләштердем. Газетада көнүзәк мәсьәләләрнең яктыртылуы бик ошый. Аеруча авыл хуҗалыгы турындагы язмаларны яратып укыйм: тирә-якта нәрсәләр булуын белү һәрвакыт кызыклы. Моннан тыш, минем прокуратурада һәм судта 28 ел эшләү тәҗрибәмне исәпкә алып, законнар һәм җинаять эшләре турындагы басмаларны зур игътибар белән күзәтеп барам. “Авангард”ны мин башыннан ахырына кадәр укып чыгам һәм почтальонның китергәнен түземсезлек белән көтеп алам. Газетада сәламәтлек турындагы материаллар күбрәк булса, бик әйбәт булыр иде. Алар, әлбәттә, бар, әмма яраткан газетам битләрендә андый язмаларны тагын да ешрак күрәсе килә.