Перспективалы юнәлешне үзләштерә

Яшь ир-ат авыл хуҗалыгы производствосы нигезләрен үзләштереп кенә калмый, ә үз бизнесын да уңышлы үстерә, шул исәптән ташламалы кредит алу программасы ярдәмендә дә.

Булат агымдагы елның язында агач эшкәртү һәм агач әйберләр, конструкцияләр һәм модульле корылмалар ясау белән шөгыльләнә башлаган. Элегрәк Казанда йортлар салган, әмма вакытлар узу белән көндәшлек арткан, һәм егет инде төзелгән йортларны төзекләндерү: беседкалар, түбәләр, террасалар, мунчалар, хуҗалык блоклары урнаштыру белән шөгыльләнергә карар кылган.

– Мин моны бик перспективалы юнәлеш дип санадым һәм аны үзләштерергә булдым. 2024 ел азагында әлеге идея белән яна башладым, язын бина сайларга тотындым, финанс­лау төрләрен карадым, шул исәптән дәүләт ярдәмен дә. Беренче продукцияне – сүтелә торган беседканы – без агымдагы елның 24 апрелендә үк чыгардык. Сезон эчендә без 30дан артык беседка ясадык. Бездә сату географиясе киң: Димитровград, Ульяновск, Чабаксар, Казан, Яр Чаллы, Тәтеш, – дип билгеләп үтә Булат Хәбибуллин. – Миңа, хәрби хәрәкәтләр ветераны булуым белән бәйле рәвештә, бер процент белән бирелгән 5 миллион сум күләмендәге кредит предприятие үсешен тизләтүгә бик нык йогынты ясады. Аның ярдәмендә без барлык кирәкле җайланмалар сатып ала алдык һәм җитештерүнең тулы циклын эшләтеп җибәрдек, ягъни без шомартылган коры такта сатып алмыйбыз, без аны үзебез җитештерәбез. Хәзерге вакытта җитештерүдә 4 кеше эшли.

Махсус хәрби операциядә катнашучыларны эшкә урнаштыру Тәтеш районы башлыгы Рәмис Сафиуллов контролендә тора. “Ватанны саклаучылар” фонды хәрби хәрәкәтләр ветераннарын яңадан укыту һәм яңадан әзерләү мәсьәләләренә аерым игътибар бүлеп бирә. Хәзерге вакытта Булат Хәбибуллин моның ярдәмендә “Фермерлар мәктәбе”ндә белем ала. Моннан тыш, ул кабат Казан дәүләт аграр университетында укуын дәвам итә, махсус хәрби операциядә катнашу сәбәпле, аңа укуын туктатырга туры килгән.

– “Фермер мәктәбе”ндә мин “Авыл хуҗалыгы кооперациясе” юнәлешен сайладым. Ул миңа кызык­лы, чөнки мин агротуризм белән бәйле бизнесны эшләтеп җибәрү турында уйланам. Туристлар базасы төзергә телим, анда кешеләр килә, ял итә һәм бер үк вакытта авыл хуҗалыгы җитештерүе белән таныша алачак, – ди Булат Хәбибуллин.

Татарстан Республикасы буенча “Ватанны саклаучылар” дәүләт фонды филиалының Тәтеш районындагы социаль координаторы Радик Шәмсетдинов билгеләп үткәнчә, киләчәктә эшкуарлык эшчәнлеге өчен кирәк булачак яңа белемнәр алырга беркайчан да соң түгел. Аның әйтүенчә, “Фермерлар мәктәбе”нә гаризалар күп тапшырылган, әмма барысы да катгый сайлап алудан үтмәгән. Ветераннарга ел ахырында үзләренең конкурс  программасын якларга һәм киләчәктә дә шул программа буенча эшләргә туры киләчәк.

– “Ватанны саклаучылар” фонды, хәрби хәрәкәтләр ветераннары яхшы хезмәт хакы түләнә торган эш тапсын һәм алга таба гаиләсен барлык кирәкле әйберләр белән тәэмин итсен өчен, эшкә урнаштыруны үзенең беренчел бурычы дип саный. Моның өчен фонд тарафыннан эшкә урнаштыру, беренче чиратта, укыту буенча бик күп программалар эшләнде, – дип хәбәр итә Радик Дамир улы.

Декабрь башында Булат Хәбибуллин Татарстан делегациясе составында Ватанны саклаучылар елы ябылуга багышланган киң күләмле чарада ­катнашты.

– Булат безнең республикадан барган ун делегатның берсе булды. Форум Мәскәүдә узды һәм махсус хәрби операциянең меңгә якын катнашучысын җыйды. Анда елга нәтиҗә ясалды, эшлекле очрашулар, мәдәни программа оештырылды, анда ветераннар бер-берсе белән аралаша, тыныч тормышка җайлашу һәм эшкә урнашу тәҗрибәләре белән уртаклаша алдылар, – дип йомгак­лады сүзен Радик Шәмсетдинов.

фото: Алена Пантюхина