Авыл эшчәннәренә дан җырладылар

(Тәтеш, 13 сентябрь, “Тәтеш таңнары”). Чуваш милли эчемлеге фестиваль-конкурсы, халык иҗаты эшләнмәләре күргәзмәсе, театральләштерелгән кереш бүлек һәм күп кенә башкалар: Кошки-Новотимбаево авылында, мәгърифәтче Иван Яковлевның кече ватанында бишенче тапкыр “Чуклеме” бәйрәмен билгеләп үттеләр. 

Салкынча һәм болыты һава торышы булуга карамастан, Кошки-Новотимбаево авылындагы чарага барырга теләүчеләр шактый иде. Алар өчен Иван Яковлевның Мемориаль музеена бушлай экскур­сия оештырылды, халык иҗаты эшләнмәләре һәм табигать нигъмәтләре күр­­­гәзмәләре эшләде, Тә­­­теш районының чуваш авылларында яшәү­челәр милли ризыкларны тәкъдим иттеләр. Иң нәни кунаклар милли уеннар  мәйданчыгын яратып өлгерделәр. 
Чуваш милли эчемле­ге ­фестиваль-конкурсы бәйрәм ­кунакларында аерым бер танылу ­ал­ды. Һәр­бер хуҗабикә аны үзен­чә, үзләре генә белгән рецепт буенча әзерләгән­нәр, аны яшерен сер итеп ­саклыйлар. 

–  “Чуклеме” бәйрәме – районыбызда яшәүче­ләрнең бердәмлек һәм дуслык символы. Әлеге милли бәйрәм чуваш халкының милли гореф-гадәтләрен саклауда матур үрнәк булып тора. Бәйрәм үткәрелә торган мәйдан ел саен төзекләндерелә, чарада катнашучыларның һәм кунакларның саны артып тора, – диде Тәтеш районы башлыгы Рәмис Сафиуллов.  

“ТР муниципаль берәм­лекләре советы” Ассоциациясе рәисе Әгъзам Гобәй­дуллин авылда яшәүче­ләрне һәм кунакларны Татарстан Президенты һәм Хөкүмәте исеменнән котлады, районның чуваш милли-мәдәни үзәге җитәкчесе Володар Тимофеев һәм башка мәртәбәле кунак­лар җыелучыларга җылы теләкләр белән мө­рәҗәгать иттеләр.

Авыл кешеләренең хез­мәтен һәм чувашларның яңа уңыш бәйрәме тарихын чагылдырган теат­ральләштерелгән кереш бүлек тамашачыларны битараф калдырмады. 

– Кошки-Новотимбаевода үтүче “Чуклеме”га икенче ел рәттән киләм. Матур, күркәм бәйрәм, аңа кеше күп җыела – авыл кешеләре өчен шатлык, бөтен район өчен чын вакыйга. Бәй­рәмдә балаларның булуы сөендерә. Алар менә шулай үз халкының мәдә­ния­­тен күреп үсәләр, – дип билгеләп үтте шәһәрле Светлана ­Митяшова.

Тантана Татарстанның Тәтеш, Буа, Чүпрәле, Нурлат, Чирмешән районнары, Чувашиянең Шомыршы һәм Яльчик районнары, Чабаксар һәм Ульяновскиның иҗат коллективлары чыгышы белән тәмамланды. Артистлар җырлары, бию­ләре белән тамашачылар­га рух күтәренкелеге өс­тәделәр. “Сарнай” ансамбле җырчылары Вера белән Людмила “Чуклеме” бәйрәменә беренче тапкыр килгәннәр.

– Концерт программасы ошады. Барысы да югары дәрәҗәдә оештырылган. Бәйрәмдә күп танышларыбызны очраттык. Әле тагын да киләчәкбез! – дип уртаклаштылар алар.