Саулык теләделәр

Профессионал бурычларына тугры калган – кешеләр сәламәтлеге турында кайгырт­кан медицина хезмәткәрләре биредә дә күңелле белән файдалыны берләштерде: бәйрәм кунаклары кандагы шикәр күләмен, кан басымын белә алдылар, шәфкать туташлары бу очракта аларга киңәшләре белән ярдәм иттеләр.
Тәтеш ягы тарихы музее хезмәткәрләре тарафыннан тәкъдим ителгән “Медицина чыганак­лары” дигән күргәзмә чарага килгән тәтеш­леләр өчен танып белүле булды.
Узган гасыр башында земский медицинасы традициясенә нигез салынган,  хәзерге буын медицина хезмәткәрләре аны намуслы дәвам итә. “Кешеләр сәламәтлеге хезмәтендә без бер командада эшлибез”, – диде үзәк район хастаханәсе баш табибы Ринат Салаватуллин, залны тутырып килгән тамашачыларга көч-көдрәт һәм рух күтәренкелеге теләп.
Теләсә кайсы табиб киң күңеллелек һәм тормыштан шатлык таба белү сәламәтлеккә, озын гомерлелеккә йогынты ясый дип әйтер, ә Сөмбел Хәбибуллинаның район медицинасы  ветераннарына бүләк иткән музыкаль номерында яраткан эшләренә тугрылыклары өчен рәхмәт сүзләре яңгырады, барлык залга көч-куәт өстәде.
Район хастаханәсе коллективы күбесенчә гүзәл затлардан тора, алар кеше хәленә керә белү, дәвалау, өмет уяту һәм, әлбәттә, дуслаша белү белән аерылып тора. Анна Хышова белән Елена Туганова хатын-кыз дуслыгына тугрылык турында белдерделәр.
Районның медицина системасы шәһәрдәге учреждение белән генә түгел, аларның саны елдан-ел арта барган Олы Тархан участок хас­таханәсе, Олы Шәмәк амбулаториясе, авыл ФАПларының игелекле эшләре белән аерылып тора. Медицина хезмәткәрләре кешеләргә сыйфатлы ярдәм күрсәтеп, актив иҗтимагый эш алып бара. “Күңел ачу”, “Умарина”, “Ак чәчәкләр”, “Салам” коллективлары, Гөлчәчәк Хәбибуллина һәм Венера Рәхимкуллова, Миләүшә Минәева һәм башка артистлар Тәтеш җирендә яшәүче халыкларның иҗатын, милли дуслыгын күрсәттеләр. Тамашачы Барноджон Рузиматованың таҗик биюен ихлас алкышлап сәламләде.
Руслан Сәфәровның аһәңле тавышы, тәэсирләндергеч җырлавы бәйрәм программасын тагын да ямьләндереп җибәрде, тамашачыларда бертуктаусыз алкышлар дулкыны булдырды, бу ак халатлы кешеләргә карата ихлас рәхмәт буларак яңгырады.
Лина Тихонова (автор фотосы)