Имтихан билетлары урынына – күнекмәләр мәйданы

(Тәтеш, 31 март, «Тәтеш таңнары»). Без “Коткару эшләре” төре буенча имтиханда булдык. Билет урынына биредә –­ җайланмалар белән эш мәй­данчыгы, теория урынына – модельләштерелгән производство торышы, имтихан алучылар ролендә – бәйсез ­экспертлар.

– Безнең көллияттә ­мондый төрдә имтиханнар тапшыру дүртенче ел инде гамәлдә, – ди баш эксперт, хезмәттәге коткаручы, көллият  укытучысы Александр Мерзлов. – “Коткару эшләре” төре буенча бу юлы 49 кеше имтихан тапшыра. Ул безнең студентларның гамәли биремнәрне һәм күнекмәләрне үти белү дәрәҗәсен билгели.

Биремнәрнең модульләре янгын сүндерү белән бәйле эзләү-коткару һәм һәлакәт-коткару эшләреннән, альпинистлык, беренче ярдәм күрсәтүдән тора. 402нче төрке­мнән Мария Самсонова “лабиринт” тренажерында биремне уңышлы узды. 

– Әзерләнеп, практика үтсәк тә, имтихан тапшырганда дулкынлану, ялгышу куркынычы биләп ала, – диде чыгарылыш. – Көллиятне тәмамлаганнан соң, укуымны дәвам  итәргә һәм гадәттән тыш хәлләр хез­мәткәре булырга ниятлим.

Мариянең хыялы көл­ли­ятнең күптән түгел генә тә­мамлап чыккан чыгарылышлары Дмит­рий Васин белән Евгений Мерзлов өчен тормышка ашкан, алар бүгенге имтиханда экспертлар булып торалар һәм гадәттән тыш хәлләр министрлыгында хезмәт итәләр. Үз максатыңа үҗәтлә­неп омтылсаң, аңа һичшиксез ирешәчәксең.

Бу көнне күрсәтмә имтиханнарны “Янгын куркынычсызлыгы” төре буенча чыгарылыш курс студентлары тапшыра, чиратта – “Физик культура, спорт һәм фитнес”. Имтихан тапшырган студентлар, гадәти дипломнан тыш компетенцияләр пас­порты алачак, ә алар турындагы мәгълүматлар яшь һөнәр ия­ләренең мәгълүматлар ­базасына кертеләчәк.