Роспотребнадзор мәгълүматлары буенча, Россиядә трихинеллез белән чирләү ел саен 30дан 200 очракка кадәр теркәлә.
(Тәтеш, 17 июнь, "Тәтеш таңнары"). Әлеге хәл барыннан да бигрәк дуңгызларны күпләп суйганда һәм ит продуктларын әзерләгәндә, шулай ук кыргый җанварларга ау сезоны ачылган вакытта ачыклана. Йорт хайваннары чирне суелган продуктларны, азык калдыкларын, терлек үләксәләрен ашаганда йоктыра.
Трихинеллез – гельминтозлы чир, ул зур булмаган күләмдәге нематода (түгәрәк кортлар) барлыкка китерә.
“Кеше трихинелла кортлары белән зарарланган ит һәм итле ашамлыкларны кулланганда аны йоктырырга мөмкин, – дип аңлата Тәтешнең ветеринария берләшмәсе начальнигы Рәмис Гарипов. – Чир булганда бизгәк, мускуллар авырту күзәтелә, бу инвалидлыкка һәм хәтта үлемгә китерә”.
Базарларга, кибетләргә һәм җәмәгать туклануы урыннарына китерелә торган барлык ит мәҗбүри тәртиптә трихинеллоскопия (мускул тукымаларының нәзек итеп кисеп микроскоптан карау) ысулы белән ветеринар-санитария тикшерүе уза һәм әгәр дә бер генә трихинелла барлыгы ачыкланса да, терлек ите юк ителә.
Районның баш ветеринария табибы тәтешлеләрне кисәтә: “Тиешсез сәүдә урыннарында билгесез затлардан ветеринар-санитария үткәрелү турында клеймасы яки таныклыгы булмаган ит әйберләрен, шулай ук иттән ясалган азык-төлекләрне сатып алмагыз. Ау вакытында тотылган итне ветеринар-санитария тикшерүе үткәрелмәгән килеш кулланмагыз”.
Нет комментариев