Табигый газ безнең көндәлек тормышыбызның гадәти юлдашына әйләнде, әмма газ җайланмаларын файдалану кагыйдәләрен бозу бәла-каза чыгуның сәбәпчесе булырга мөмкин.
– Күпләр газны бөтенләй куркынычсыз һәм гадәти нәрсә итеп кабул итә, – ди Тәтеш районының газ-эксплуатация хезмәте начальнигы Илнур Мөхәммәдиев. – Әмма бу даими игътибарлылык һәм кагыйдәләрне төгәл үтәүне таләп итә торган куәтле энергия ресурсы. Иминлекнең гади чараларын санга сукмау еш кына авыр нәтиҗәләргә – сөрем газы белән агуланудан алып шартлауга кадәр китерә. Төп кагыйдә – эшли торган җайланмаларны беркайчан да күзәтүсез калдырмау. Хәтта сез чәйнекне кайнарландырсагыз гына да, плитәдән ерак китмәгез. Бу бигрәк тә өйдә кечкенә балалар булганда мөһим: алар өчен газ приборларына кагылу мөмкинлеге бөтенләй дә булмаска тиеш. Газ кабызыр алдыннан бинаны һичшиксез җилләтегез. Приборлар эшләгән вакытта форточка ачык калырга тиеш – ул газның тулысынча януы өчен кирәкле саф һава агымын тәэмин итә.
– Гадәти яну тыныч, зәңгәрсу-шәмәхә төстәге тигез ялкын торышында булырга тиеш, – дип төгәллек кертә Илнур Илсур улы. – Әгәр ялкын җемелдәп тора, сүнә яки саргылт төс ала башласа – бу хәвефле сигнал. Кичекмәстән краннарны ябыгыз һәм бинаны җилләтегез.
Белгеч әйтүенчә, төтен чыгару юлларына һәм җилләтү юллыкларына аерым игътибар бүлеп бирергә кирәк. Күпфатирлы йортларда аларны идарәче компанияләр тикшерә, һәм анда яшәүчеләргә бу эшләргә комачауламау мөһим. Шәхси йортларда җаваплылык милекче җилкәсенә төшә: елына ким дигәндә өч тапкыр (җылыту сезоны башланыр алдыннан, уртасында һәм тәмамланганнан соң) төтен һәм җилләтү каналларының торышын тикшерергә кирәк.
– Моның өчен махсус оешмаларны җәлеп итү әйбәтрәк, – дип билгеләп үтә Илнур Илсур улы.
– Профессионал булмаган кеше сөрем газы чыгуга китерәчәк кечерәк төзексезлекләрне күрмәскә мөмкин. Газ сигнализаторлары урнаштыру – бәла-казаны киметүнең заманча ысулы. Әлеге приборлар һавада янучан газлар һәм сөрем газының концентрациясен өзлексез контрольдә тота. Рөхсәт ителгән күләмне арттырганда алар тавыш һәм яктылык сигналлары бирәләр, ә ябык клапанлы модельләр газ бирүне автомат рәвештә туктаталар. Җайланманы сайлаганда паспорты һәм тиешле сертификаты булуга игътибар итегез. Җайланманы көйләүне бары тик әлеге хезмәтне башкарырга рөхсәт ителгән оешмалар гына эшләргә тиеш.
Нәрсәне катгый рәвештә эшләргә ярамый:
• газ плитәсен бинаны җылыту яки әйберләрне киптерү өчен кулланырга;
• җайланмаларны үзең төзекләндерергә, яңа кабаттан урнаштырырга яисә конструкциясенә үзгәрешләр кертергә;
• төтен үткәргечләрне җилләтү юллыкларына тоташтырырга;
• газ чыгуны ачык ут ярдәмендә тикшерергә;
• газ баллоннарын торак биналарда сакларга.
Әгәр сез газ исе килүен сизсәгез
1. Газ приборларын куллануны туктатыгыз.
2. Приборлардагы һәм газ үткәргечләргә куелган краннарны ябыгыз.
3. Җилләтүне тәэмин итегез: барлык тәрәзәләрне һәм форточкаларны ачыгыз.
4. Һич кенә дә электр приборларын кабызмагыз һәм сүндермәгез – хәтта сүндергечкә басу да очкын китереп чыгарырга мөмкин.
5. Барысын да бинадан чыгарыгыз һәм фатирдан чыгыгыз.
6. Хәвеф-хәтәр чыгарга мөмкин булуы турында күршеләргә хәбәр итегез.
7. Куркынычсыз урыннан газ хезмәтенә шалтыратыгыз:
04 – стационар телефоннан;
104 – кәрәзледән;
112 – бердәм ашыгыч хезмәт номеры.
Белгечләр килгәнче бинага кире кермәгез һәм анда чит кешеләрне кертмәгез.
Мөһим
1. Газ җайланмаларын урнаштыру, төзекләндерү һәм аларга техник хезмәт күрсәтү буенча барлык эшләрне бары тик квалификацияле белгечләр генә башкарырга тиеш.
2. Даими рәвештә техник хезмәт күрсәтүгә килешү төзү – ул имин файдалануның мәҗбүри шарты.
3. Төзексезлек билгеләрен: ялкынның төсе үзгәрүен, үзгә тавышларны, газ исе килүне игътибарсыз калдырмагыз.
4. Авария хезмәтләре контактларын күренеп торган урында саклагыз.
5. Гаиләнең барлык әгъзалары өчен инструктаж үткәрегез: газ исе килгәндә нәрсә эшләргә кирәклеген һәркем белергә тиеш.
Газ куллану кагыйдәләрен үтәү – формальлек түгел,
ә яшәү зарурилыгы. Игътибарлылык, җаваплылык һәм инструкцияләрне төгәл үтәү бәла-казаны булдырмаска һәм иң кыйммәтлесе – сәламәтлекне, гомерне сакларга ярдәм итәчәк.
фото: Алсу Зиһаншина
Нет комментариев