“Профессионалларның һәр очрашуы матур вакыйгага әйләнергә тиеш”, – дип саный Олы Тархан урта мәктәбе коллективы, анда татар теле һәм әдәбияты укытучыларының район семинары узды.
(Тәтеш, 30 апрель, “Тәтеш таңнары”).
Укытучылар мәктәп бусагасын атлап кергәч, гүзәллек дөньясына чумдылар. Комган белән кулларны юу һәм аларны чигелгән сөлгеләргә сөртү милли йолаларның бер күренеше булды. Хуҗаларның кунакчыллыгы коймак белән “Дуслык чәе” табыны артында да сизелде.
Семинарны ачу актлар залында булды. Мәктәптә озак еллар татар теле һәм әдәбияты укыткан укытучыларның исемнәре әйтеп үтелде. Расих Интал улы, аларның балаларны тәрбияләүгә керткән өлешләрен ассызыклап, ТРның атказанган укытучысы Рушания Шакированы билгеләп үтте, ул аның хакында брошюра язган. Бу басманы ул кунакларга бүләк итте.
Мәктәпнең яшь артистлары тамашачыларны җырлар һәм биюләр белән сөендерде. Спектакльдән өзек күрсәткән мәктәп театры чыгышы да күңелдә уелып калды. Ә инде мода театрындагы модельләрнең татар киемнәрен күрсәтүләре ихлас гаҗәпләнү һәм соклану хисләре уятты. Мондый күркәм һәм бай эчтәлекле очрашудан соң укытучылар дәресләрдә булдылар.
Иҗади семинарны мастер-класслар, түгәрәк өстәл төгәлләде. Кунаклар мәктәп коллективына рәхмәт белдерделәр, күргәннәрдән һәм ишеткәннәрдән соклану хисләре кичерүләрен яшермәделәр.
– Семинар мәктәп коллективының иҗадилыгын күрсәтте. Ул зональ һәм республика семинарлары дәрәҗәсендә булды, – дип билгеләп үттеләр чарада катнашучылар.
Нет комментариев