Бакырчы авылы мәдәният йортында махсус хәрби операциядә катнашучыларга ярдәм итү максатыннан “Бакырчы чәе”н савытларга тутыру чарасы уздырылган.
– Әлеге игелекле гамәлдә авыл хатын-кызлары, мәктәп укучылары катнашты. Чәй савытларын җырлый-җырлый, күңел җылыбызны кушып, матур теләкләр теләп ясадык. Укучылар солдатларга җылы эчтәлектәге хатлар яздылар. Җырларда җырланган туган як үләннәре сугышчыларыбызга көч-куәт, ә инде өчпочмаклы хатлар шатлык хисләре өстәсен иде. Элек бит әби-бабаларыбыз шифалы үләннәрдән ясалган чәйләрне тәмле булсын өчен генә түгел, файдасы тисен дип тә кулланганнар. Әлеге хуш ис бөркеп торган чәйләр туган якларын өзелеп сагынган солдатларга чиксез бер шатлык өстәр дигән өметтә калабыз. Без җибәргән күчтәнәчләр ир-егетләребезгә рух күтәренкелеге бирер, үзләрен туган җирләрендә көтеп торуларын аңларга этәргеч ясар дип ышанабыз. Аларның исән-имин туган җиребезгә, гаиләләренә кайтуларын көтеп калабыз, – дип сөйләде әлеге чарада катнашкан Лилия Мәҗитова.
Екатерина Гафурова фотосы
Нет комментариев