Студент елларын искә алганнар

Анда алар уку йортын тәмамлаганнан соң кырык ел узгач үткәрелгән очрашудан алган тәэсирләре белән уртаклаша.

– Без, 41нче һәм 42нче төркемнәрне тәмамлаучылар өчен 9 августта Тәтеш авыл хуҗалыгы техникумының ишекләре ачык иде. Анда без иртәнге сәгать 9да җыелдык. Бик дулкынландыргыч булды, чөнки кайберләребез 40 ел буе күрешмәгән. Хатирәләргә бирелү өчен үзебез белән чыгарылыш альбомын да алып бардык. Бер-беребезнең күзләренә, йөзләренә бераз кыенсынып карадык. Аннары бина эченә үттек (директорга рәхмәт, безгә катлар буйлап йөрергә рөхсәт итте), үзебезнең сыйныфлар, фән кабинетлары, актлар залы, һәр тәнәфестә йөгергән ашханәнең кайда урнашканын искә төшердек, чөнки гел ашыйсы килеп тора иде. Яшь, актив идек. Белемле, гадел укытучыларыбызны искә төшердек. Ни аяныч, аларның күбесе инде исән түгел. Аннары шәһәр урамнары буйлап йөрдек, анда да күп нәрсәләр яхшы якка үзгәргән. Паркта, “Белуга” сыны янында фотога төштек, уңыш китерсен дип, аның борынын сыпырдык. Кафеда төшке аш белән тукландык. Табын бик матур итеп әзерләнгән иде, моның өчен кафе хуҗасына һәм очрашуны оештыручыларга – ризыклар сайлаган өчен рәхмәт. Табын янында күп сүзләр әйтелде. Һәркем студент елларындагы мизгелләрне искә төшерергә тырышты. Җырладык, бие­дек, аннары Вшиха тавындагы күзәтү мәйданчыгына бардык, каравыл манарасын карадык, данлыклы баскычтан төштек. Яңгыр яуды, әмма бу безгә комачауламады. Аерылышу бик моңсу булды, әмма алда барыбызны да эш атнасы, хезмәт көннәре көтә иде. Тәтеш авыл хуҗалыгы техникумында безгә олы тормышка чыгу өчен яхшы нигез салынды. Мәктәпне тәмамлаучылар техникумга укырга керсәләр, моңа беркайчан да үкенмәячәкләр, дип уйлыйбыз, – дип яза чыгарылышлар.

Фото: Андрей Егоров