Тәтештә «Бергә тапшырабыз. БДИ тапшыру көне» булып үтте

Тәтеш муниципаль районының имтихан кабул итү пункты базасында «Бергә тапшырабыз. БДИ тапшыру көне» булып үтте.
Анда 2025 елдагы чыгарылыш сыйныф укучыларының ата-аналары, җәмәгать эшлеклеләре, муниципаль берәмлек җитәкчелеге һәм массакүләм мәгълүмат чаралары вәкилләре катнашты.

Акция кысаларында катнашучылар база дәрәҗәсендәге математика буенча БДИ биремнәрен чишүдә үз көчләрен сынап карадылар. Акциянең максаты - ата-аналарга бердәм дәүләт имтиханын уздыру барышын аңларга, борчылуларны мөмкин кадәр киметергә һәм балаларына йомгаклау аттестациясенә әзерләнүдә ярдәм күрсәтергә булышлык итү. Катнашучылар әлеге БДИның барлык этапларын үттеләр: теркәлү, инструктаж, бланклар тутыру һәм контроль биремнәрне хәл итү.

Имтиханны тәмамлагач, ата-аналарның үз тәэсирләре белән уртаклашу, мәгариф системасы вәкилләренә сораулар бирү мөмкинлеге булды.