Традициягә матур башлангыч салдылар

Алар өчен бәхетле булган көндә яшьләр гаиләнең беренче документын – өйләнешү турындагы танык­лыкны алдылар, туганнары һәм дуслары аларны  бәйрәмчә рух күтәренкелеге, бүләкләр белән сөендерделәр. 

Район башлыгы Рәмис Сафиуллов исеменнән ирле-хатынлы Семеновларга район башкарма комитетының ЗАГС бүлеге начальнигы Лариса Дианова матур теләкләр язылган котлау сүзләрен ирештерде. Аларга тәбрикләмә белән истәлек сувениры тапшырды. 

Яшь парлар сөйләвенчә, Сергей – тәтешле, Дарья – Ульяновск өлкәсеннән. Алар яшь кыз районыбызга кунакка кайткач очрашканнар, дүрт ел  дуслашып йөрү вакытында хисләре ныгыган һәм яшьләр тормышта мөһим адым ясарга – гаилә корырга ­булганнар.  

– Без инде Тәтештә гаилә корабыз, гаиләбездә тулылану булуын, нәселебез дәвам итүен телибез, – дип елмаеп уртаклаштылар алар. 

Нәкъ тә әлеге пар ЗАГС бүле­гендә яңа традициягә башлангыч салды да инде – алар “Якташ солдатларга хат яз” акциясенең беренче катнашучылары булдылар.

Сергей белән Дарья рәхмәт сүзләре белән сугарылган хатны укыгач, “Игелек тартмасы”н махсус хәрби операциядә катнашучыларга җибәрү өчен ­тапшырдылар. 

– Алда торган бәйрәмнәр якынлашканда без анда конфетлар, печенье, шоколад, консервалар куйдык. Безнең туганнарыбыз, дусларыбыз Ватаныбыз мәнфәгатьләрен яклыйлар, без алар өчен борчылабыз, ярдәм итәбез, аларның җиңү белән тизрәк өйгә кайтуларын ­телибез, – дип уртаклашты яшь өйләнешүчеләр.