Үзләренең фитнес заллары да булачак

(Тәтеш, 8 август, "Тәтеш таңнары"). Соңгы елларда монда барлыкка килгән матур үзгәрешләр сок­лану уята. 

“Бездә барысы да шулхәтле тиз алышына, моңа үзебез дә гаҗәпләнәбез, – дип уртаклаша бакырчылар. – Юлларны, сугыш елларында һәлак булган авылдашлар хөрмәтенә монумент һәйкәлне күптән түгел генә ясаган идек кебек тоела, яңа мәдәният йорты күз алдында калкып чыкты, ФАП төзеделәр, балалар мәйданчыклары барлыкка килде, авыл хуҗалыгы производствосы җайга салынды... Кизләү янындагы парк зонасына сөенергә өлгермәдек, мәктәп ишегалдында спорт комплексы урнаштыру буенча эшләр башланды, ә мәктәп территориясе үзе гаҗәеп үзгәреш ала бара!”

“Җирлекне үстерү – безнең мөһим бурыч. Сәламәт яшәү рәвешен киң җәелдерү, үсеп килүче буынны тәрбияләү безнең өчен әһәмиятле, – ди җирлек башлыгы Илдар Шәмсетдинов, инде әзер булган диярлек объектны канәгатьлек хисләре белән күрсәтеп. –

Физкультура дәресләреннән тыш биредә җирлек һәм хәтта район күләмендә мини-футбол, волейбол, баскетбол буенча ярышлар уздырырга мөмкин булачак. Менә турник, гимнастика җайланмасы – күнегүләр ясар өчен барысы да бар, менә шөгыльләнер, ГТО нормативын тапшырыр өчен воркаут. Монда коймалап алдылар, киләчәктә фитнес залы төзү өчен казыклар кактылар, ә җайланма (аны күрергә кирәк!)  мәктәп спортзалында үз чиратын көтә. Яшәр һәм эшләр өчен уңайлы шартлар булдыруда ярдәм күрсәтүчеләрнең һәммәсенә зур рәхмәт. Киләчәктә спорт, балалар һәм яшьләр шөгыльләнүгә шундый комплекслы якын килү – барысы да безнең яктагы демог­рафия мәсьәләсен хәл итү өчен башкарыла”.
“Бездә хәзер заманча спорт мәйданчыгы булуына сөе­нә­без һәм горурланабыз, – ди
Бакырчы урта мәктәбенең физкультура укытучысы Геннадий  Рыжов. 
– Безнең  балалар спорт секцияләрендә кызыксынып шөгыльләнә. Активта район дәрәҗәсендәге бүләкләр шактый, мәктәп укучыларының күбесе республика ярышларында катнаша. Әгәр инде беришләренең яхшы нәтиҗәсе була икән, ул чакта инде башкалар да алар артыннан тартыла. Мәктәп укучыларының җиңү теләгеннән күзләре ут яна”.
Мәктәп бинасының эчке ягына керәбез, анда яңа буялган буяуның исе аңкый – гадәттәгечә җиңелчә ремонт бара, ә менә спортзал төптән үк үзгәргән: идәннән алып түшәмгә кадәр яңалык балкый. Диварлар янында бер рәт булып тренажерлар тезелгән, өстән аркан асылынып тора, баскетбол алкалары ялтырый. 

“Спорт белән шөгыльләнер өчен кирәкле барлык әйберләр дә бар”, – дип кушыла безгә физкультура буенча икенче укытучы Алмаз Абдрахманов. Ул башлангыч сыйныфтагы балалар белән шөгыльләнә, тормыш иминлеге нигезләрен укыта, “Яшь армияче” хәрби-патриотик хәрәкәтенә һәм “Форпост” хокук тәртибен сак­лау буенча мәктәп отрядына җитәкчелек итә. “Көн тәртибе, сәламәт тук­лану, гигиена, чыныгу – бу тиешенчә физик үсү өчен нигез. Боларның барысын да балаларда кече яшьтән үк үстерәбез һәм ныгытабыз, ә инде олырак сыйныфларда спорт нәтиҗәләренә бергәләп сөенәбез, – дип сөйли педагог. – Авыл кешеләренең физкультура һәм спорт белән актив рәвештә шөгыльләнүе сизелә. Кышын балалар да, өлкәннәр дә  чаңгыда шуа, ә җәен велосипедта йөри, футбол һәм баскетбол уйный. Менә без дә улларым белән кичләрен өч велосипедта авылны әйләнәбез. Асфальт тигез, утлар балкып яна, күңел күтәренке”.  

“Безнең мәктәптә үз эшенең осталары, чын энтузиастлар хезмәт куя, – ди директорның тәрбия эшләре буенча урынбасары Альбина Алмазова. – Геннадий Иванович балалар белән 15 елдан бирле эшли, Алмаз Дамир улы – 5. Алар дәресләрне мавыктыргыч итеп үткәрәләр, һәрбер дәрес тәрбияне, гыйлемне үстерүне күз уңында тота. Мәктәп коллективы һәрвакытта райондагы һәм авылдагы барлык чараларда катнаша, җирлектәге администрация белән тыгыз хезмәттәшлектә эшлибез. Балалар спорт белән шатланып шөгыльләнә, ә бу гомер буена”.

Авылдан чыкканда кешеләр­нең көндәлек эш белән мәшгуль булуын күрәбез, кемдер тәрәзә алмаштыра, кемдер – йорт түбәсен ремонтлый – тормыш кайный. Ә спорт белән шөгыльләнергә теләүчеләр буш вакытларында сәламәтлеген ныгытсын, физик яктан ка­мил­ләшсен өчен Бакырчыда барлык шартлар булдырылган.