Гаиләләре белән спортны яраталар

(Тәтеш, 29 апрель, “Тәтеш таңнары”).Тәтештә “Барс” спорт-сәламәтләндерү комплексында “Әни, әти, мин – спорт сөюче гаилә” дип исемләнгән ярыш булып узды. Анда Тәтеш районы мәктәпләрен тәкъдим итүче командалар катнашты.

–     Гаиләләр белән мондый ярышлар уздыру матур гадәткә әверелер һәм икенче юлысында командалар саны күбрәк булыр дип өметләнәбез. Спорт ярышлары сезнең команда рухын ныгытсын һәм гаиләләрегезне тагын да берләштерсен иде, – диде сәламләү сүзендә район башкарма комитеты мәгариф бүлеге начальнигы Гөлнара  Кирилина.

Ярыш нәтиҗәләре буенча Әхмәдуллиннар (Байраш мәктәбе) гаиләсе җиңүче булды, Сәйфетдиновлар (Бидәңге мәктәбе) икенчелекне яулады, өченче урын­ны Сергеевлар (Тәтештәге 1нче урта мәктәп) һәм Илюшкиннар (Тоншерма мәктәбе) бүлеште. Әхмәдуллиннар уртаклашканча, аларга ярышта катнашырга тәкъдим иткәч, шунда ук ризалашканнар, өстәвенә үзләренең җиңәчәгенә йөз процент ышанычлы булганнар. 

– Әти  –  командада иң көчлесе. Ә команда рухы безгә җиңәргә ярдәм итте, – дип спорт көненә нәтиҗә ясады Әхмәдуллиннарның уллары Рәхим. Катнашучыларның барысы да кыйммәтле призлар белән бүләкләнде.