Иң көчлеләр сайлап алуны узды

Анда биш команда – Тәтеш дәүләт гражданнарны яклау көллиятенең 18 яшьтән өлкәнрәк яшь категориясендәге курсантлары – һәм 18 яшькә кадәрге биш яшьләр командасы катнашты. 
Чемпионатта катнашучы 50 кеше­нең барысы да куркынычсызлык техникасы буенча инструктажлар узды, мәйданчыклар һәм җиһазлар белән танышты. 

Өч көн дәвамында кон­­­­курсантлар коткару эш­ләрендә үз осталык­ла­рын күрсәттеләр, тәҗ­ри­бә уртаклаштылар һәм ква­лификацияләрен ­арттырдылар. 

Гражданнарны яклау көллияте директоры Татьяна Адаева әйтүенчә, көллият “Коткару эш­ләре” компетенциясе буенча мондый җаваплы ярышларны сигезенче тапкыр уздыра. Аның сүзләренчә, көллият профессионаллары да, яшьләр дә Татарстанда һәм Россиядә иң яхшылардан санала. Өстәвенә Тәтеш, Васильевка, Куйбышев Затоны, Биләр, Казан яшь­ләре әлеге компетенцияне үз уку йортлары базасында үзләштерәләр, шулай ук көллият базасында да. Узган елгы чемпионат нәтиҗәләре буенча Санкт-Петербургта өлкәннәр составы командасы көмеш медаль алды, ә яшьләр чемпион булды.

Региональ этапның бурычы – сайлап алу ярышларында Татарстанны лаек­лы тәкъдим итәчәк һәм Бөтенроссия чемпионаты финалына чыгачак иң көчле, иң әзерлекле егетләрне сайлап алу. 

Ярыш нәтиҗәләре буенча алтын һәм көмеш медальләргә көллият кот­каручыларының өлкән төркеме ия булды, яшьләр арасында Тәтештәге 1нче урта мәк­тәп командасы җиңү яулады, Васильевка кадет мәктәп-интернаты укучылары икенче булды.