Алар өчен игътибар һәм кайгыртучанлык бик мөһим

Ул игелекле гамәлләр, изге теләкләр, бүләкләр белән билгеләп үтелде. Матур гадәт буенча көмеш яшьтәге кешеләргә социаль, көнкүреш, медицина ярдәме оештырыла.     

Районның кайбер пред­приятие­лә­рендә ветераннарны хөр­мәтләделәр, кайбер оешмаларда пенсионерларны өйләренә барып котладылар һәм күчтәнәчләр өләштеләр. 

Тәтеш үзәк район хас­таханәсе табиблары бригадасы график буенча ерак авылларга барып, анда яшәүче өлкән яшьтәге гражданнарга тирәнтен медицина тикшерүе үткәрде, шулай ук поликлиникада да гражданнарны амбулатор кабул итү гамәлгә ашырылды. 

Татарстан Республикасы Хезмәт, халыкны эш бе­лән тәэмин итү һәм социаль яклау министрлыгының Тәтеш районындагы социаль яклау бүлеге һәм ведомство карамагындагы учреждениеләр тарафыннан волонтерлык ярдәме кысаларында өйгә барып социаль-көнкүреш хезмәтләре күр­сәтү буенча “Рәхмәт бел­дерәм” акциясе оештырылды. “Форпост” студентларның иминлек  хезмәте волонтерлары халыкка ­социаль хезмәт күр­сәтүче “Тә­теш балкы­шы” үзә­ген­нән со­ци­аль хезмәтләр алучылар янына бардылар һәм аларга йорт яны тер­ри­то­рияләрен җыеш­тыруда, тәрәзәлә­рен юуда шеф­лык ярдәме күрсәттеләр.

Тәтештәге картлар һәм инвалидлар интернат-йортында социаль хезмәтләр алучыларга зур игътибар бүлеп бирелде. Алар янында “ТР муниципаль берәмлекләр Советы” Ассоциациясе рәисе Әгъзам Гобәйдуллин булды һәм Тәтеш районы башлыгы Рәмис Сафиулловтан бүләкләр тапшырды. Интернат-йортта яшәүчеләргә шулай ук ТР Дәүләт Советы депутаты Ләлә Кудерметова, ТРның Апас районындагы социаль яклау идарәсе началь­нигы Зөлфия Гайнуллина, Тәтеш һәм рес­пуб­ликаның башка районнарыннан волонтерлар да бүләкләр белән килделәр. 

Районның гомуми белем бирү учреждениеләрендә мәрхәмәтлелек һәм игелек­лелек дәресләре, тематик әңгәмәләр, сыйныф­тан тыш чаралар, өлкәннәргә зур булышлык күрсәтү максатыннан “Игелек визитлары” үткәрелде. Шәһәр­дәге балалар бакча­ларында бәйрәм чаралары үткәрелде, анда сабыйлар пенсионерларны күңелле җырлары, бию­ләре, сәнгатьле итеп ши­гырьләр сөйләүләре белән сөендерделәр. 

“Көзге игелек атнасы” акциясе кысаларында Тә­теш ягы тарихы музеенда Бөтенроссия сукырлар җәмгыятенең Тәтеш җирле оешмасы әгъзалары өчен Молоствовлар утарына түләүсез экскурсия ­оештырылды. 

Үзәк китапханә хезмәт­кәрләре сукырлар җәмгы­ятенең җирле бүлеге өчен әдәби-музыкаль чара оештырды. Балалар ки­тап­ханәсендә өлкән буын ке­шеләре өчен “Яшәү генә тү­гел, сәла­мәт тә булу мөһим” дип исем­ләнгән сәламәтлек сәгате булды. “Барс” спорт-сәла­мәт­ләндерү комплексында олы яшьтәгеләр арасында “Өлкән буын” Спартакиадасы узды. Җиңү паркында “Күңел белән яшь” дип исемләнгән актив озын гомерлеләр клубы вәкилләре велосипед йөртүдә ярыштылар, кроссвордлар һәм ребуслар чиштеләр, транспортларны белүгә пазллар җыйдылар.   

“Яңа гасыр” мәдәни-кү­ңел ачу үзәге белгечләре шәһәрдәге 1нче урта мәктәп укучылары белән берлектә Өлкәннәр көне уңаеннан котлау открыткасы ясау буенча “Яраткан әбием өчен бүләк” дигән мастер-класс үткәр­деләр. Шулай ук “Актив озын гомер” клубы әгъзалары өчен “Самавыр янында очрашу” әдәби-музыкаль ки­чә” дип исемләнгән чара ­оештырылды.  

Өлкәннәр ункөнлеге дәвамында 42 кеше шәһәр мунчасында түләүсез юынудан файдаланды. 

Шәһәрдә һәм районда яшәүчеләр өчен Өлкәннәр көне уңаеннан авыл хуҗа­лыгы ярминкәсе оештырылды. Авыл хуҗалыгы товар җитештерүчеләре һәм авыл җирлекләре вәкилләре тәтешлеләргә арзан бәядән товарлар тәкъдим иттеләр. 

Өлкәннәр ункөнлеге тә­мамлану олыларның көн­күрешен яхшырту, социаль яклау дәрәҗәсен арттыру, аларны иҗти­магый тормышка җәлеп итү буенча эшләр тәмам­ланды дигән сүз түгел әле, ул дәвам итә. Көмеш яшьтәге кешеләргә игътибар һәм кайгыртучанлык һәрвакыт кирәк.