Керәнне ничек бетерергә

“Россельхозцентр” ФДБУнең ТР филиалының әйдәп баручы агрономы Салават Галимҗанов җавап бирә:

– Керән чынлап та иң тере үсемлекләрнең берсе булып тора, һәм аның куәтле тамыр системасы кишәрлектәге башка культураларны басып китәргә сәләтле. Әмма проблемага системалы якын килсәң, аны хәл итәргә мөмкин.

Тамырын казып алу. Тамыр системасының зарарлануын киметү өчен сәнәк кулланыгыз, чөнки көрәк еш кына тамырларны кисә, ә бу аның алга таба үсүенә ярдәм генә итә. Керәнне туфрак дымлы һәм йомшак булганда, көзен яки иртә язда казыгыз. Хәтта вак тамырчыкларның да алынганлыгына инаныгыз, чөнки алар яңа бәбәкләр бирергә мөмкин.

Изоляция. Җирне казып, 40 – 50 сантиметр тирәнлеккә шифердан, тимер калайдан яки тыгыз пластиктан чит-читләрен бүлеп алыгыз. Бу бакчаның башка өлешләренә тамырларның таралуына юл куймаячак.

Механик ысуллар ярдәм итмәгән очракларда гербицидлар кулланырга мөмкин. Тамыр системасына тәэсир итүче глифосат нигезендә ясалган препаратларны сайлагыз. Башка үсемлекләргә эләкмәс өчен, аларны нокталы рәвештә керән яфракларына сөртегез. Эшкәртүне үсемлекнең актив үсү чорында җилсез коры һава торышында башкару яхшырак.

Томалап кую. Керән үскән кишәрлекне тыгыз материал (кара пленка, картон, рубероид) белән каплагыз һәм сезон буена калдырыгыз. Яктылык кермәсә, үсемлек зәгыйфьләнә һәм һәлак була.

Контроль һәм профилактика. Хәтта керәнне алганнан соң да кишәрлекне  яңа бәбәкләр булу-булмавына даими рәвештә тикшерегез. Яшь шытымнарны вакытында алу үсемлеккә кире үсеп китәргә ирек бирмәячәк.

Бакчага шулай ук горчица, арыш, солы яки люцерна кебек сидератлар сибүнең нәтиҗәсен дә билгеләп үтмичә булмый. Алар тиз үсә һәм куәтле тамыр системасын үстерә, шуның белән туклыклы матдәләр, су һәм яктылык өчен керән белән көндәшлек тудыра. Сидератларны чәчәк атканчы чабарга һәм туфракка салырга кирәк. Бу орлыклануны булдырмый калачак һәм керәнне юк итү нәтиҗәсен көчәйтәчәк.
фото ясалма интеллект ярдәмендә ясалган