Көзгеләрне чистарту серләре

Ә бит көзгеләрне ялтыра­туның сере еш кына көнкү­реш химиясендә түгел, ә аш-су бүлмәсендәге шкафта яки аптечкада булып чыга. Тикшерелгән халык чаралары ярдәмендә көзгеләргә кибеттән алган вакыттагы кебек чагын ничек кайтарырга икәнен сөйлибез. 

Серкә һәм лимон: кислота тапны бетерә
Әгәр көзге тоныкланса, табигый кислоталар яр­дәмгә киләчәк.
Серкә эремәсе. Серкә белән суны 1:3 нисбәтендә кушыгыз. Бу чара – майлы тапларның һәм бармак эзләренең чын дошманы.
Лимон фрешы. Ике стакан суга бер лимон согын кушу известь “утырмаларын” бетереп кенә калмыйча, бүлмәне саф хуш ис белән дә тутырачак.

Спирт куллану ысулы: мизгел эчендә кибү
Спиртның төп өстенлеге – ул таплар калырга өлгергәнче үк парга әйләнеп юкка чыга.
Чисталык өчен: спиртны су белән 1:1 нисбәтендә кушыгыз. Бу маркер, ручка эзләрен яки майлы бармак эзләрен юу өчен бик яхшы состав.
Нашатырь спирты. 1 литр суга 1 миллилитр нашатырь спирты да җитә.
Бик көчле пычранган урыннар өчен нашатырь спиртын теш порошогы белән болгатып, боткасыман катнашма ясарга була. Бу зур тапларны бетерү өчен бик яхшы чара.

Чәй тылсымы һәм иске колготкилар
Куе чәй төнәтмәсе куллану – иң гадәти булмаган, ләкин нәтиҗәле ысул. Кара чәй составында танин бар, алар пыялага үзенчәлекле ялтыравык бирә.
Әгәр гади чүпрәк урынына чәйле һәм тозлы суга манылган иске капрон колготки куллансагыз, нәтиҗәсе сезне таң калдырачак – капрон өслекне бик яхшы ялтырата һәм бернинди эзләр дә калдырмый.

Сода катлаулы очраклар өчен
Әгәр юыну бүлмәсендәге көзгедә судан калган тап­лар барлыкка килсә, сода катнашмасы ярдәмгә килер. Аны берничә минутка тапларга сылагыз, йомшак тукыма белән сак кына ышкыгыз һәм сөртеп алыгыз.

Алтын кагыйдә: 
сез нинди генә чара сайласагыз да, соңгы эш итеп һәрвакытта да коры микрофибра салфетка яки гади кәгазьне кулланыгыз – бу нәтиҗәне яхшыртыр һәм көзгегә бик яхшы ялтырау бирер.

фото яи ярдәмендә барлыкка китерелгән