Коронавирус балаларны да аямый

(Тәтеш, 3 февраль, “Тәтеш таңнары”, Алинә Тарханова, фото автора).

– Коронавирус балаларны да аямый. Аларга вакцина ясатырга ки­рәкме? – дигән сорауны бирдек без Тәтеш үзәк район хастаханәсе баш таби­бының эпидемиология мәсьәләлә­ре буенча урынбасары Алмаз ­Юнысовка.

– Ни аяныч, коронавирус инфекциясе белән балалар да зарарлана һәм авырый. Коронавирусның яңа штаммы – “омикрон” килү белән авыручылар саны да артты. Ата-аналарга балаларының сәламәтлек торышын игътибар белән күзәтергә кирәк. Әгәр аңар­да өч тәүлектән артык югары температура, бик нык хәлсезлек һәм йокы килү булса, туклануы начарланса, тамагы авыртса һәм бераз коры ютәл булса, беренче чиратта педиатр белән элемтәгә керергә һәм хәлне төгәл итеп аңлатып бирергә яки ашыгыч ярдәм чакыртырга кирәк. Тәмне һәм исне сизмәү, өлкәннәрдәге кебек үк, вирус штаммына бәйле. “Омикрон” штаммын йоктырганда бу билгеләр сирәк очрый башлады, шул исәптән яшүсмерләр арасында да, – дип билгеләп үтә Алмаз Фәрит улы. – Ба­ланың чир белән зарарлануы турында мәктәпкә хәбәр итәргә кирәк, анда эпидемиягә каршы чаралар күреләчәк. Мондый очракларда класс бер атна карантинга ябыла, ә укыту дистанцион рәвештә була. Балаларга, олы кешеләр кебек, шундый ук профилактик чараларны үтәр­гә: кулларны сабынлап юарга, төчкергәндә һәм йөткергәндә авызны томаларга кирәк. 5-6 яшьтән олыраклар, яшүсмерләр җәмәгать урыннарында битлек киеп йөри ала­лар. 

12-17 яшьлек балалар яңа коронавирус инфек­циясеннән балалар хас­таханәсендә вакцина ясата ала. Процедура ике компонентлы “Спутник М” препараты белән ясала, ул нәкъ тә балалар өчен эшләнгән. Сәламәтлек сак­лау ми­нистрлыгы хәбәр иткән­чә, вакцина биш тапкыр җиңелләштерелгән “Спутник-V” төреннән гый­барәт. Антитәнчекләр кү­ләмен саклау өчен  эш­ләп чыгаруга әлеге концен­трацияләр җитә. 15 яшькә кадәргеләрнең ата-аналары янәшәдә булу һәм аларның ризалыгы катгый рәвештә мәҗбүри булып тора. Ә менә 15 яшьтән башлап бала вакцина ясатуны мөстә­кыйль рәвештә хәл итә ала.
Кискен вирус инфек­цияләре, хроник авы­ру­ларның кискенләшүе, ­шулай ук көчле аллергия чирләре булганда вакцина яса­тырга ярамый.

фото: Татар-информ