Техниканы яхшы белә

(Тәтеш, 10 август, «Тәтеш таңнары», Юлия КАЛИНИНА, автор фотосы). Без аны “Акрос-5” комбайнын урып-җыю вакытына әзерләгән чакта очраттык. “14 яшьтән әтинең комбайн ярдәмчесе булып эшли башладым. Хис-тойгылар әлегә кадәр сак­ланып калган”, – дип искә төшерә Андрей.

2009 елда егет армия­гә китә, аннан кайткач, “Нива” ҖЧҖга эшкә урнаша. Хәзер аның вазифасына са­бан культураларын чә­чү, чиста пар җирләрен эшкәртү, комбайннарны ремонтлау керә. Техниканы ул бик яхшы белә, югыйсә махсус уку йортлары тәмамламаган булса да. Әтисе һәрвакытта янәшәсендә була, ул машина белән “аралашуның” барлык зи­рәк­лекләренә өй­рәтә дә инде: Андрей 30 яшендә теләсә нинди төзексезлекне җиңел генә юллап чыга ала.

Ул белгечлеге буенча  икътисадчы, Казан авыл ху­җалыгы институтын тәмамлаган, әмма комбайн штурвалы артында үзен күп кенә оста механизаторларга караганда да ышанычлырак хис итә. Урак өсте вакытында икенче ел рәттән инде аның ярдәмчесе булып ике туган энесе, Тәтеш авыл хуҗалыгы техникумы студенты Валерий эшли.

Узган ел утырган яңа “Акрос”ны ул “ДОН-1500Б” бе­­­лән ча­­­гыштырганда аларның җайланмаларында күп кенә охшашлыклар барлыгын билгеләп үтә: “Яңа комбайнның бары тик кабинасы гына уртада, искесенең – сулда, һәм аның ваклагычлары юк иде”. Андрей һөнәрен алыштырырга җыенмый, бу хакта хәтта уйлап та карамый. Яхшы түләүләрен, эшенең ошавын яшерми. Һәм бу – иң мөһиме, чөнки район кырларында яшь белгечләр булу – авыл хуҗалыгының үсешен күрсәтүче үзгәрмәс билге.