Тәтештә яшәүче Оркыя һәм Рәшит Камалиевлар 50 ел тигезлектә гомер кичерә

(Тәтеш, 23 декабрь, “Тәтеш таңнары”, Галина Таҗетдинова). “Без аның белән минем авылым Иске Казиле клубында очраштык, – дип сөйли Оркыя Хафиз кызы. – Ул дуслары белән күршедәге Атабайдан килгән иде, бер-беребезне бер күрүдән ошаттык. Рәшит Тәтештә эш­ләгәч, сагыну хисләре һәм үзе­безнең хактагы хәлләр турында хатлар языша идек”. Әле тагын йорт хуҗабикәсе белдергәнчә, чын мәхәббәт өчен чынлап та аралар ерак­лыгы комачау итми. Җәй айларының берсендә яшь егетнең велосипедка утырып үзенең гүзәл Кама Тамагы районына җилдереп кайтуы да кыз өчен шуңа дәлил булган. “Башта бит әле район үзәгенә кадәр барырга, аннары әле тагын минем авылга килергә кирәк, – ди Оркыя ханым. – Яшьлек барысын да  булдыра”. Көзен Рәшит Оркыяның кулын сораган, ә гыйнварда алар күңелле итеп туй уздырганнар. Һәм яшь хатын шунда ук ире белән Тәтешкә күченеп киткән. Камалиевлар гаиләсе башта фатирда яшәгән, ә аннары икесе дә хезмәт куйган “Сельхозтехника”дан үзләренә фатир алганнар.

Рәшит Рәфхать улы әй­түенчә, ул күп вакытын эштә, юлда үткәргән. Тәтеш районына зәңгәр ягулык кертә башлагач, аны җитәкче итеп билгеләгәннәр, айлар буе авылда яшәгән дип тә әйтергә мөмкин. Ул Олы Тормыда газлаштыру эшләрен ничек итеп башлап җибәрүләрен искә ала. “Газ үткәрү  тө­зелешендә тәҗрибә булмагач, кешеләрне укырга җибәрделәр, эретеп-ябыштыручылар, слесарьлар, торба сузучылар үз эшенең осталарына әйләнделәр, эш барды, якташларының өйләренә газ тизрәк килсен өчен барысы да тырыштылар, аннары Чуашиягә дә бардык”. Оркыя ханым вакытлар узу белән санэпидстанциягә эшләргә күчә, балаларны тәрбия­ләргә дә өлгерә, абзар-курада – мал-туарны да күп асраганнар. “Ике улыбыз бар иде, – ди Оркыя Хафиз кызы, – олысы Марат авыру булгач, 18 яшьтә якты  дөньядан китте, – ди ул әрнүле итеп. – Әлегә кадәр йөрәгем сызлый, бәхеткә, улыбыз Азат бар, аның инде үз гаиләсе, оныклар – зур шатлыгыбыз. Бәйрәм табынында барысын да бергә сыйларга яратам, аеруча да өчпочмакларымны мактап ашыйлар”. 

Оркыя һәм Рәшит Камалиевлар белдерүенчә, бергә яшәгән 50 ел эчендә төрле хәлләр булса да, бер-берләренә булган мә­хәббәтне һәм хөрмәтне сак­лап калганнар, ә бергә­ләп озак яшәү­нең нигезен тынычлык, тү­землек, кеч­кенә генә ыгы-зыгыны зур ызгышларга җит­кермәүдән дип әйтәләр һәм болай дип өстиләр: “Тормышта күңелсезлекләр болай да җитәрлек, аларны арттырмас­ка, татулыкта яшәргә кирәк”.  

рәсемдә: Камалиевлар гаиләсе./ФОТО ГАИЛӘ АРХИВЫННАН