Янә алдынгылар исәбендә

(Тәтеш, 2 гыйнвар, Тәтеш таңнары, Мәдинә ИБӘТУЛЛИНА (автор коллажы)). Бүләкләү тантанасы киңәшмә кысаларында узды. ТР Дәүләт алкоголь инспекция­се җитәкчесе урынбасары Фәннур Хамматов район активын соңгы биш ел эчендәге олимпиада нәтиҗәләре белән таныштырды һәм Олы Тархан урта мәктәбенең дүрт ел дәвамында олимпиадаларда катнашуын билгеләп үтте. Мәктәпнең 8 укучысы, олимпиадада катнашып, төрле номинация­ләрдә җиңү яулады. Мәктәп өч ел рәттән Рәхмәт хатлары  һәм бүләкләргә лаек булды. “Тәтеш районында уникаль мәктәп бар, бу – Олы Тархан урта мәктәбе! – диде Фәннур Габделбарый улы. – Ул кулланучылар хокукларын яклау буенча олимпиадада катнашу активлыгы һәм нәтиҗәлелеге буенча рес­публикабызга танылды. Бу – мәктәп директоры Расих Шагаевның хезмәте”. 

Район башлыгы Рәмис Са­фиуллов һәм Фәннур Хам­матов  9-10нчы сыйныф уку­чылары Екатерина Саймуллина, Диләрә Чумарина һәм Миләүшә Әбделханованы аерым номинацияләрдә җиңүче дипломнары белән бүләкләделәр. Аларга  бү­ләкләр һәм товарлар сатып алу өчен сертификатлар тапшырылды. Татарстан Республикасы кулланучылар мәгарифе системасын үстерүгә керткән өлеше өчен Олы Тархан урта мәктәбе директоры өченче ел рәттән Татарстан Респуб­ликасының премьер-министр урынбасары, Татарстан Респуб­ликасы Мәгариф һәм фән министры Рәхмәте белән бүләкләнә. Мәктәп Дәүләт алкоголь инс­пекциясе җи­тәкчесенең Рәхмәт хатына лаек була. Унынчы сыйныф укучысы Екатерина Саймуллина инде ике ел республика олимпиадасында катнашкан һәм икесендә дә “Кулланучылар белеме нигезләрен өйрәнү” номинациясендә җиңүче булды. “Кулланучы буларак күп кенә законлы хокукларымны белдем, ә бу миңа кирәк булачак”, – дип сөйләде уку алдынгысы.

“Олимпиада гадел, кызык­лы, кирәкле. Киләчәктә җиңүләргә ирешелмәсә дә, иң мөһиме – кулланучылар хокукларын яклау буенча белемнәр тормышта кирәк булачак”, – диделәр  олимпиа­дада катнашучылар һәм җиңүчеләрнең  остазы, ТРның атказанган укытучысы Ра­сих Шагаев районның барлык мәктәп­ләрен дә инде шактый киң танылу алган  олимпиадада катнашырга чакырды.