Әгәр күршең умарта оялары куйса

Алар күршеләренең участокларында умарта оялары торуын, һәм моның билгеле бер уңайсызлыклар тудыруын, шулай ук бал кортлары чагу аркасында аларның сәламәтлегенә куркыныч тудыруын хәбәр иттеләр. 

Әлбәттә, бал кортлары белән күршелек умарта тотучыларның үзләреннән башка тагын кемне дә булса сөендерүе бик шикле. 

Без умартачыларга карата нинди таләпләр куелуын һәм аларны үтәмәгән өчен нәрсә янавын ачык­ларга тырыштык.

Аңлатма бирүләрен сорап  без Россельхоз­надзорның Татарстан Рес­публикасы идарәсе белгечләренә мөрәҗәгать иттек. 

“Россия Федерациясендә умартачылык турында”гы (№ 490-ФЗ 30.12.2020) (12.12.2023 ред.) Федераль закон һәм Россия Федерациясе Авыл хуҗалыгы министрлыгының (№ 645 23.09.2021) боерыгы нигезендә умартачылык белән шөгыльләнүче физик һәм юридик затлар бал кортлары белән умарта ояларын күрше җир кишәрлекләреннән кимендә 3 метр ераклыкта урнаштырырга тиеш булып чыкты, шул ук вакытта умарта оясы авызы әлеге җир кишәрлекләренә капма-каршы торырга тиеш, әгәр территория 2 метр биеклектәге тоташ койма белән әйләндереп алынган булса, умарта ояларының авызы төрле якка карарга һәм аларны күршеләрнең җир кишәрлегеннән кую ераклыгы да  төрлечә булырга мөмкин.

– РФ Административ хокук бозулар кодексының 10.6 маддәсенең 1нче өлеше нигезендә умарта оялары урнаштырганда кешеләрнең иминлеген тәэмин итү буенча билгеләнгән таләпләрне бозу гражданнарга – биш йөздән бер мең сумга кадәр; вазифаи затларга – өч меңнән биш мең сумга кадәр; юридик белеме булмаган килеш эшкуарлык эшчәнлеген гамәлгә ашыручы затларга – өч меңнән биш мең сумга кадәр штраф салуга яисә эшчәнлекне 60 тәүлеккә кадәр админис­тратив туктатып торуга; юридик затларга – ун меңнән егерме мең сумга кадәр яисә эшчәнлекләрен алт­мыш тәүлеккә кадәр административ туктатып торуга китерә, – дип хәбәр итә ТР буенча Россельхознадзор идарәсенең дәүләт инс­пекторы Гөлнара ­Арсланова.

Шулай итеп, әгәр күршегез умарта оялары куярга уйласа, ул сезнең участоклар арасына биеклеге ике метрдан да ким булмаган тоташ койма куеп, сезнең иминлекне тәэмин итәргә тиеш. Әгәр берәр сәбәп аркасында ул моны эшли алмаса, умарталарны сезнең участок чигеннән кимендә өч метр ераклыкта, умарта авызлары капма-каршы якка юнәлтелерлек итеп урнаштырырга тиеш.

фото: Эндже Газизова