Ана капиталының яңа мөмкинлекләре

(Тәтеш, 15 март, “Тәтеш таңнары", Татьяна Кузнецова). РПФның Тәтеш районы Ида­рәсе мәгълүматлары буенча, “Балалары булган гаиләләргә дәүләтнең өстәмә ярдәм чаралары турында”гы законда үзгәрешләр көченә керде. Шулай итеп, ана (гаилә) капиталы алу хокукына ия затлар исемлеге зурайды. 2020 елның 1 гыйнварыннан беренче сабыйларын тудырган яки тәрбиягә алган хатын-кызларга 466 мең 617 сум күләмендә ана капиталы түләнәчәк. Әгәр гаиләдә икенче бала туса, өстәмә 150 мең сум биреләчәк. 

Беренче балага карата бердәнбер тәрбиягә алучы булып торган ир-атлар да шундый ук акча алуга ­хокуклы. Икенче сабыйлары (шулай ук өченче һәм теләсә кайсы киләсе сабый, әгәр хокук булмаса) туган яки тәрбиягә алынган гаиләләр өчен ана капиталы күләме 2020 ­елдан хәзер 616 мең 617 сум тәшкил итә.
Тәтештәге Китаевлар гаиләсендә берничә көн элек беренче сабыйлары – кыз туды. “Беренче сабыйга ана капиталы түләнәчәге турында ишеткән идек. Аны нәрсәгә сарыф итәргә икәнлеген әлегә уйламадык. Финанс ярдәме – бу бик яхшы, әмма иң мөһиме – бала сәламәт булсын”, – дип уртаклашты яшь ана ­Вера Китаева.

Россиядә ана капиталы программасы 2026 ел ахырына кадәр ­озайтылды.