Бөтенроссия ярышларында республика данын яклаячаклар

(Тәтеш, 24 март, “Тәтеш таңнары”, Галина Таҗетдинова, фото Виктории Ватутиной). Чемпионатта курсантларның алты командасы катнашты, алар “Янгын куркы­нычсызлыгы” төрендә үз осталыкларын һәм күнекмәләрен күрсәттеләр.  

Көллият директоры Тать­яна Адаева сәлам­ләү сүзендә көллият һөнәри осталык ярышларында 2015 елдан алып катнаша, дип билгеләп үтте. Курсантлар “Коткару эшләре” һәм “Янгын куркынычсызлыгы” төрләрендә яхшы нәтиҗәләргә ирешәләр.   

– Кеше үзе хакында якты эз калдырырга, яңа белемнәр үзләштерергә, җәмгыятькә файда ките­рергә, профессионал булырга һәм туплаган тәҗрибәсен яшь буынга тапшырырга тиеш, – дип билгеләп үтте Татьяна Юрьевна. – “Янгын куркынычсызлыгы” һөнәри осталык компетенциясе иң мөһимнәрнең берсе булып санала. Монда бик яхшы физик әзерлек белән бергә, сез интеллектуаллар да булырга, гамәли күнекмәләргә ия һәм теорияне бик яхшы итеп белергә тиеш. 

Ярышларда ­катнашу өчен, курсантлар көл­лия­тнең уку каби­нет­ла­рында гына түгел, ә “Коткару эшләре” оста­ханәсе, компетен­ция­ләрнең махсус үзәге, ресурс үзәге мәйдан­чык­ларында да һөнәри һәм гамәли әзерлек уздылар.

Һәм шушы барлык вакыт эчендә алар янә­шә­сендә һәрчак остазлары булды. Яңа чемпионат циклында 2021 елгы “Ворлдскиллс”ның төбәк чемпионаты җиңүчеләре, 2022 елгы илкүләм чемпионат финалында катнашучылар, шулай ук янгын сүндерүче булып эшләүче һәм көллият укытучысы  экспертлар сыйфатында чыгыш ясадылар.

Төрле модульләр буенча ярыш сынаулары барышында яшьләр каравыл хезмәтендә эшләү, янгынны сүндерү, янгын куркынычсызлыгы, профилактик эшләр алып бару, авария-коткару эшләрен башкару һәм башка биремнәрне үтәделәр. Чемпионатның баш эксперты Илнар Арсланов билгеләп үткәнчә, һәрбер этапны дөрес һәм төгәл итеп башкарып чыгу җиңелләрдән түгел, аларның барысы да чынбарлыктагы хәрби шартларга тәңгәл китерелгән, димәк, төгәл һәм ышанычлы итеп эш итәргә кирәк.

Ярыш нәтиҗәләре бу­ен­ча беренче урынны эксперт-остаз Адель Галләмов җитәкчелегендәге өченче курслар командасы алды.

– Чемпионат алдыннан без өч ай дәвамында ныклап әзерләнү белән шөгыльләндек, безнең эксперт-остазыбыз Адель Галләмов булды, – дип уртаклашты команданың капитаны Камил Ши­һапов. – Җиңәргә дигән максат куйдык. Моңа теориядә һәм практикада ныклы күнекмәләр узу нәтиҗәсендә ирештек. Әзерлек барышында да, ярышлар барышында да безнең биш кеше арасында команда рухы, бердәмлек хисе булды. Алда әле тагын – ныклы күнегүләр, Россия дәрәҗәсе, көндәш­лек зур, без барлык осталыкны һәм күнекмәләр­не бик яхшы итеп күрсә­тер­гә тиеш булачакбыз.

ТР буенча ФЯХның 133нче часте начальнигы Сергей Фокин, көллият залында ­чемпионатны ябу тантанасында чыгыш яса­ганда, яшьләргә изге те­­ләк­ләрен әйтеп, без­нең көллият командасы абруйлы ярышларда берничә тапкыр лаек­лы чыгыш ясады, бөтенроссия ярышларында бу юлы да сы­натмаслар, дип бил­геләп үтте.