Cчетчикны алыштыралар

(Тәтеш, 28 июль, «Тәтеш таңнары», Алсу Җиһаншина фотосы). “Челтәр компаниясе” ААҖ “Буа электр челтәрләре” филиалының Тәтеш районы электр челтәре начальнигы Виктор Демагин хәбәр иткәнчә, респуб­ликаның кайбер шәһәрләре һәм районнарында “Электр сервисы”, “Энергия контроле” исемнәре белән оешмалар эшли һәм алар үзләрен “Тат­энергосбыт” АҖ хезмәткәрләре буларак күрсәтергә мөмкиннәр.

Әлеге оешмаларның вәкилләре гражданнарга исәпләү приборларын алыштырырга кирәкле­ге­нә инандырып, ялгыш адымга этәрәләр. Өстәвенә, бәясе 700-900 сум торган исәп приборларын аларга ике мең алты йөз сумга саталар.

Зыян күрүчеләр булып, кагыйдә буларак, пенсио­нерлар һәм ышанучан, хәбәрдар булмаган гражданнар тора. 
Гамәлдәге канун нигезендә, электр энергиясен исәпләү приборын алыштыруны бары тик гарантияле тәэмин итеп торучы яки милек хуҗасы һәм күп фатирлы йорт идарәсе белән килешү төзегән идарәче оешма гына тормышка ашырыр­га тиеш. Өстәвенә, ике тапкыр – башта яңа счетчик урнаштырганчыга ка­дәр пломбаның торышын тикшерү өчен, ә аннары – яңа пломба кую һәм приборны исәпкә кую өчен. Киресенчә булганда, үз белдеклегең белән куелган прибор белән электр энергиясен куллану исәп­кә алынмаган  булып санала. Исәпләү приборларының файдалануга яраклылыгы турындагы сораулар буенча сез “Тат­энергосбыт” АҖга мөрәҗәгать итә аласыз.