Чыгарылыш сыйныф укучылары иң яхшысы химия, физика, тарих һәм җәмгыять белемен тапшырган

(Тәтеш, 21 июль, "Тәтеш таннары"). 

Имтиханнарның ничек узуы турында Тәтеш районы башкарма комитетының мәгариф бүлеге начальнигы Гөлнара ­Кирилина сөйләде.

– 2021 елгы чыгарылыш сыйныф укучылары БДИны 2021 елның 31 маеннан 2  июленә кадәр тапшырдылар.Районда БДИга әзерлек ­ничек барды?
– Районда Тәтештәге 1нче урта мәктәп базасында имтихан үткәрү пункты эшли. Ул стационар металл эзләгеч һәм видеокүзәтү чаралары белән җиһазландырылган. Шул ук уку йортында инглиз теле буенча БДИ үткәрүне оештыру өчен лингафон кабинет булдырылды. Гамәлдәге санитар-эпидемиологик шартларда имтихан үткәрү пункты саклану чаралары белән җиһазландырылды. Быел БДИга барлыгы 9 аудитория җәлеп ителде.
Имтихан үткәрү пунктларына 57 хезмәткәр җәлеп ителде, 2021 елның апрель-май айларында алар барысы да имтихан үткәрү тәртибе буенча укулар узды.

– Быел укучылар рус теле һәм математика буенча имтиханны ничек тапшырдылар?
– Рус теле буенча дәүләт йомгаклау аттестациясендә Тәтеш районы гомуми белем бирү учреждениеләрен тәмамлаучы 91 кеше катнашты. Алынган мәгълүматларны анализлау имтихан нәтиҗәләренең тотрык­лылыгы турында нәтиҗә ясарга мөмкинлек бирә, алдагы елларда чыгарылыш сыйныф укучыларының уртача белем дәрәҗәсе раслана. Районда рус теле буенча БДИның уртача тест баллы – 72,32, 2020 елда – 71,72. Татарстан буенча уртача балл – 74,7. Тәтешнең 2нче урта мәктәбендә, Алабирде, Бакырчы, Олы Тархан, Олы Шәмәк, Килдеш, Киртәле, Нармонка һәм Урюм урта мәктәпләрендә уртача балл район белән чагыштырганда югарырак. Олы Тархан мәктәбе укучысы Диләрә Чумарина иң югары нәтиҗәне күрсәтте – 98 балл. Тагын 8 чыгарылыш сыйныф укучысы 90 баллдан югарырак нәтиҗәләр күрсәтте. Бу фән буенча минималь чикне ­узмаучылар юк.
Математика буенча профиль дәрәҗәдәге БДИны 66 чыгарылыш сыйныф укучысы тапшырды. Бу фән буенча Тәтеш районы буенча уртача балл 61,75 тәшкил итте. Чагыштыру өчен, 2020 елда – 64,09. Бераз түбәнәю бар, шуңа күрә тырышып эшләргә кирәк. Барлык чыгарылыш сыйныф укучылары минималь чикне уздылар.
– Башка фәннәр буенча бердәм дәүләт имтиханнары нәтиҗәләре нинди?
– 2020 ел белән чагыштырганда физика, химия, тарих, җәмгыять белеме буенча БДИның йомгаклау күр­сәткечләре яхшырды. 2020 ел белән чагыштырганда география, әдәбият буенча нәтиҗәләр бераз кимеде. Математика, физика, химия, тарих, җәмгыять белеме, география буенча күрсәткечләр рес­публиканыкыннан югары. 
Бер чыгарылыш сыйныф укучысы химия буенча минималь чикне узмады. 2021 елда 22 чыгарылыш сыйныф укучысы “Укудагы аерым уңышлары өчен” медаленә дәгъва итте. Медальне раслау өчен рус теленнән кимендә 70 балл һәм сайлап алынган фән буенча минималь балл җыярга кирәк иде. 22 чыгарылыш сыйныф укучысының берсе медальне расламады.