Чыршыда утлар җем-җем яна

(Тәтеш, 30 декабрь, “Тәтеш таңнары”).Дәүләт янгын күзәт­челеге белгечләре Яңа ел­га электр гирляндаларын сайлау һәм аларны куллану кагыйдәләрен үтәүгә җа­ваплы карарга киңәш итә.  

– Заводта эшләнгән электр гирляндаларын фай­­­­­­да­ланыгыз, аларның төр­гәкләрендә янгын куркынычсызлыгы сертификациясе тамгалары бар; гирлянданы кулланыр алдыннан электр чыбыкларын җентекләп тикшерегез, чыбыкларны изоляцияләүгә һәм тоташтыруга аерым игътибар итегез; төзек­сезлекләр ачыкланган вакытта гирляндаларны тәр­тип­кә китерегез; берьюлы өчтән артык гирлянда кулланмагыз, чөнки электр челтәрләре кызып кыскача ялганыш булырга мөмкин, – дигән киңәшне бирә тәтеш­леләргә Кама Тамагы һәм Тәтеш районнарының кү­зәт­челек эшчәнлеге һәм профилактик эшләр районара бүлеге өлкән сорау алучысы Фәнис Камалетдинов. –  Әгәр өйдән чыгып китсәгез яки йокларга ятсагыз, гирляндаларны кабызган килеш калдырмагыз; урам яктан, мәсәлән, үз йортыңның тышкы ягын бизәгән вакытта, бина эчендә эшләр өчен билгеләнгән гирляндаларны һәм озынайткыч җайланмаларны кулланмагыз; гирляндаларны сайлаганда аз куәтлесенә өстенрәк бирергә тырышыгыз. Янгын чыккан вакытта электр гирляндасын алыгыз, янгын сүндерүчеләрне ча­кыртыгыз. Әгәр килеп чыккан хәл янгынны мөстәкыйль рәвештә сүндерү мөмкинлеген бирсә – ялкынны тыгыз тукыма белән томалагыз, янгын сүндергеч җайланманы ­кулланыгыз.   

Янгын чыккан очракта, кичек­мәс­тән 01, 101 һәм 112 телефон­нары буенча хәбәр итегез. Адресыгызны, ничәне кат, нәкъ тә нәрсә янганлыгын, шулай ук үзегез­нең исем-фамилияне әйтер­гә онытмагыз. Үзегезнең һәм якын­нарыгызның гомерен ­саклагыз.