Пневмония – инфекциядән барлыкка килгән үпкә тукымасының ялкынсынуы.
(Тәтеш, 12 ноябрь, “Тәтеш таңнары”). Бу авыруның исемен без коронавирус эпидемиясе белән бәйле рәвештә еш ишетәбез. Пневмония, аның билгеләре һәм профилактик чаралары турында без Тәтеш үзәк район хастаханәсенең гомумтәҗрибә табибы, табиб-рентгенолог Фирдүс Сәлахов белән сөйләштек.
– Пневмониянең билгеләре нинди?
– Медицина хезмәткәрләре тарафыннан күрелә торган бөтен тырышлыкларга карамастан, пневмония бүгенге көнгә кадәр иң киң таралган авыруларның берсе булып кала бирә. Аның төп билгеләре: бизгәк, 38,0-39,5 градуска кадәр югары температура, ютәл була, тын кысыла, какырык бүленеп чыга, кайвакытта күкрәк читлеге авырта. Кайчагында авырулар күкрәктә сызлану яки авырту сизәргә мөмкин. Хәлсезлек, эшкә сәләтлелек кимү, тирләү, йоклый алмау, ашыйсы килмәү билгеләре күзәтелә.
– Пневмонияне профилактикалауның чаралары бармы?
– Сәламәт яшәү рәвеше алып барыгыз: чыныгыгыз, физкультура һәм спорт белән шөгыльләнегез, ешрак саф һавада йөрегез, шул ук вакытта сезон буенча киенегез. Тәмәке тартучы кешеләрдән читтәрәк булыгыз: тәмәкене күп тарту сулыш юлына һәм иммунитетка начар йогынты ясый, һәм үзегез дә тәмәке тартмагыз. Аксым, микроэлементлар һәм витаминнар җитәрлек дәрәҗәдә булган сәламәт туклану алып барыгыз. Көндәлек рационда яшелчә, җиләк-җимеш, ит, балык, сөт ашамлыклары булу мәслихәт.
Гриппка каршы прививка ясатыгыз – пневмония еш кына аның өзлегүе булып тора.
Сулыш юллары (ОРВИ яки грипп) инфекциясе булган кешеләр белән якыннан аралашмагыз, җәмәгать урыннарында битлек киеп йөрегез, кешеләр күп җыелган урыннарда йөрүдән тыелыгыз. Бүлмәләрне мөмкин кадәр ешрак җилләтегез һәм дымлы җыештыру үткәрегез. Авыручылар белән бәйләнешкә кермәгез. Кулларыгызны сабын белән ешрак юыгыз, бигрәк тә йөткергәннән яки төчкергәннән соң. Спирт кушылган әйберләр белән кулларны эшкәртүнең нәтиҗәсе зур.
– Әгәр кеше пневмония кичерсә, нәрсә эшләргә?
– Сулыш күнегүләре ясагыз: сулышны тирән итеп алып, суламый торыгыз. Күнегүләрне яхшы итеп җилләтелгән бинада утырган килеш яки урамда ясасаң һәм аны 5-10 тапкыр рәттән кабатласаң яхшырак. Җиләк-җимеш һәм яшелчәләр белән тукланыгыз. Гәүдә авырлыгына карап көнгә 1,5тән 2,5 литрга кадәр су эчәргә кирәк. Стресслар кичермәскә һәм туйганчы йокларга тырышыгыз, тәүлегенә кимендә 8 сәгать йокласаң яхшы. Саф һавада ешрак һәм күбрәк җәяү йөрергә тырышыгыз. Шулай ук йөгерү белән шөгыльләнергә киңәш ителә.
Әгәр хәлсезлек тойсагыз – үз белдеклегегез белән дәваланмагыз! Бу гомер өчен куркыныч. Сәламәтләнергә ярдәм итә торган даруларны бары тик квалификацияле табиб кына дөрес итеп билгели ала. Сәламәт булыгыз!
Нет комментариев