“Авангард” газетасы редакциясендә энтузиаст- иҗтимагыйчылар, Тәтеш ягы тарихы музее, үзәк китапханә һәм район башкарма комитетының архив бүлеге вәкилләре катнашында “Фигнер гаиләсе” темасына түгәрәк өстәл булды.
(Тәтеш, 7 май, “Тәтеш таңнары”, Юлия Калинина).
Җирле музейда танылган революционер – “Народная воля” оешмасы әгъзасы Вера Фигнерның шәхси әйберләре бар, аның турында шактый күп мәгълүматлар табарга була. Әмма аның апалары Лидия, Ольга, Евгения һәм ике абыйсы Николай белән Петр да шундый ук танылуга ия булган.
– Кыз туганнары самодержавие белән көрәштә актив катнашканнар. Моңарда тау инженеры, бакыр чыгаруның яңа ысулларын уйлап тапкан абыйсы Петрның да катнашы булган. Бары тик танылган опера җырчысы, Петр Чайковскийның күңеленә хуш килгән Николай Фигнер гына революция оешмалары эшчәнлегендә катнашмаган, – дип билгеләп үтә шәһәрле Олег Евсеев. – Аларның барысы да, шулай ук туганнары да билгеле бер елларда Тәтеш өязендә яшәгәннәр, берничәсе безнең якта туган. Гаиләнең игелекле гамәлләр башкаруы да: Никифорово һәм Васильевка авылларында мәктәпләр төзү, авылда беренче җәмәгать китапханәсе ачу шактый зур әһәмияткә ия.
Энтузиаст Александр Болденков танылган Фигнер гаиләсе вәкилләренең тормышын өйрәнү белән берничә ел дәвамында шөгыльләнә. Баксаң, шәһәрле Анатолий Хохлов саклагычында да кызыклы фактлар бар икән. Олег Евсеев түгәрәк өстәл утырышына Фигнерның апалары, абыйлары биографияләре белән “Незаслуженно забыты” (“Бер дә юкка онытылганнар”) дип исемләнгән брошюра әзерләгән.
Район архивындагы документларда Вера Фигнерның Тәтештәге педагогика училищесында (элек педтехникум) булуы турындагы мәгълүматларны тапкан Милица Иванова да кызыклы хәбәрләре белән уртаклашты.
Түгәрәк өстәл кысаларында музей һәм китапханә вәкилләре чыгыш ясады.
Утырыш барышында Фигнер гаиләсенең биографиясенә күзәтү ясаганда килеп чыккан кызу бәхәс нәтиҗәсендә (Интернетта күп кенә каршылыклы мәгълүматлар бар), шәһәрдәге үзәк китапханә каршында тупланма эш алып бару карар ителде, анда энтузиаст-иҗтимагыйчылар тарафыннан безнең район тарихы турында тупланган мәгълүматлар җыеп барылачак.
Нет комментариев