Игелек эшләргә ашыгыйк

(Тәтеш, 19 декабрь, “Тәтеш таңнары”).

Олы Тормы авылы мәдәният хезмәткәрләре Лилия Гафиятуллина белән Рушания Мусина сәламәтлеге буенча мөмкинлекләре чикле кешеләр белән очрашып, аларның тормыш-көнкүреше белән кызыксынган. “Үзләренә күрсәтелгән игътибарга алар бик шатланды”, – диләр мәдәният хезмәткәрләре.

Сөендек авылы мәдәният хезмәткәре Люция Хәлиул­лова сәламәтлекләре буенча мөмкинлекләре чикле авылдашларының өйләренә барган һәм аларга күчтәнәчләр тапшырып, изге теләкләрен ирештергән.

Зур Әтрәч авылы шәфкать туташы Миләүшә Минәева, мәдәният хезмәткәрләре Илһам Хәйбуллин белән Зөбәрҗәт Хәйруллина сәламәтлекләре буенча мөмкинлекләре чик­ле авылдашлары янына барганнар. Аларның яшәешләре белән кызыксынып, игътибар һәм хөрмәт күрсәткәннәр. 
“Игелекле гамәлләре өчен рәхмәт. Шулай хөрмәт күр­сәтүгә якыннарыбызның бик күңелләре булды. Йөрәкләрне эретергә игътибар һәм җылы сүз дә җитә” – диләр сәламәтлекләре чикле кешеләрнең якыннары.

Түбән Тархан авылы китапханәчесе Гүзәл Шәмсет­динова балачактан инвалидлыгы булган авылдашларының хәл-әхвәлен белешкән. “Аларга бу тормышта яшәве җиңел булмаса да, аларның ихтыяр көче нык”, – ди мәдәният хезмәткәре.

Байраш, Алабирде, Зур Әтрәч мәдәният хезмәт­кәрләре Ләйсән Хәйруллина, Рамил Ильясов, Алсу Шаһиәхмәтова, Илһам Хәйбуллин Олы Шәмәктәге картлар-инвалидлар интернат-йортына барганнар. “Интернат-йортта тәрбияләнүчеләргә изге теләкләребезне әйттек һәм күчтәнәчләр тапшырдык”, – дип уртаклаштылар игелек­ле гамәл башкарган киң күңелле райондашлар.