Кадетлар кыюлыкка имтихан тапшырды

(Тәтеш, 20 август, «Тәтеш таңнары», Ләйсән МАНТОВА).  Тәтеш кадет-интернат мәктәбендә тәрбияләнүчеләр “Яшь десантчы” хәрби-патриотик лагерендә ял итте.

Алар көн саен  парашют-десант әзерлегендә һәм төрле чараларда: спорт ярышларында, җиңел атлетика кроссында, комплекслы хәрбиләштерелгән эстафетада, хәрби диңгез флоты ветераннары белән очрашуда катнаш­тылар. Кадетлар әле тагын Казандагы Горький исемендәге үзәк паркта узган Һава десанты гаскәрләре көненә багышланган респуб­лика митингында булдылар. Безнең дүрт кадетка мактаулы каравыл сос­тавында булу бәхете насыйп итте. Тәтеш кадетлары төркеменең җитәкчесе, тәрбияче Сергей Костюнинга митингта ТР буенча “Десантчылар берлеге” төбәк­ара иҗтимагый оешмасы төбәк бүлегенең Рәхмәт хаты тапшырылды.
Парашют белән сикерү – бу үзенә күрә бер батырлык. Тәтешнең сигез кыю кадеты парашют белән 900 метр биек­лектән сикерде. Владислав Лис­ков, Вадим Малышев, Камил Шәйхиев күктә беренчеләрдән булып ак парашютны ачтылар. Никита Хмелев, Диа­на Корсакова, Анастасия Малькова һаваны икенче тапкыр иңләделәр. Никита Хохрин инде өченче тапкыр сикерде һәм парашют әзерлеге буенча 3 разрядны үтәде. Александр Архипов өчен бу бишенче сикерү булды һәм ул парашют әзерлеге буенча 2 разряд кандидатлыкны яулады, өстәвенә аны иң яхшы командир дип тә таныдылар. 

“Коркачык” Үзәк аэроклубның парашют звенасы җитәкчесе Тәтештән килгән кадетларны иң тәртипле, җаваплы һәм әзерлеклеләр буларак билгеләп үтте. ТР буенча “Десантчылар берлеге” күчмә кубогы өчен респуб­лика хәрби-патриотик клуб­лары һәм берләшмәләре арасында хәрби-спорт беренчелегендә катнашу нәтиҗәләре буенча Тәтеш кадетлары яраткан мәктәпләренә беренче урын өчен сигез диплом һәм ике кубок алып кайттылар, шуның берсе кадет интернат-мәктәбендә кала, чөнки бу инде икенче җиңү (күчмә кубокны балалар беренче тапкыр узган җәйне алдылар).

Нәтиҗә буларак: грамота һәм кубок­лар гына түгел, бу шулай ук файдалы, яхшы уйланылган ял да, үзеңнең иң яхшы сыйфатларыңны күрсәтү һәм кадетның ихтыяр көчен сынау да, – диде шәкертләре өчен горурлык белән мәктәп директоры урынбасары Римма Афанасьева. – Кечерәк кадетларга үрнәк алырлык курсантлар бар”.