Тәтештәге 2нче урта мәктәптә райондагы уку йортлары укытучылары, Рима Сафиуллова җитәкчелегендәге “Ак калфак” оешмасы вәкилләре, ата-аналар катнашында семинар булды.
(Тәтеш, 28 февраль, “Тәтеш таңнары”, Сәния Сәмигуллина фотосы).“Семинар мәктәп директоры Фиргать Гаффаровның сәламләве, укытучы Гөлия Нәфигыйнаның мәктәптә милли мәгарифнең торышы белән таныштыруыннан башланды. Укытучылар Миләүшә Галиуллина һәм Сария Фәткуллина семинарда ачык дәрес уздырды. Өлкән сыйныфлар мәктәпнең бай эчтәлекле музее белән таныштырып, Бөек Ватан сугышы турындагы стенд һәм экспонатлар янында әдәби программа күрсәтте. Гөлия Әмин кызы 2нче сыйныфларда укучы татар балалары һәм аларның ата-аналары белән сыйныфтан тыш чара уздырды”, – диде Сәлимә Арсланова, семинардан алган тирән тәэсирләре белән уртаклашып.
“Милли тәрбия яшәсен дисәк, беренче, ата-анадан башларга кирәк, аның тамыры – гаиләдә. Әти-әниләр катнашында узган бүгенге тәрбия чарасы шуның бер мисалы. Районның “Ак калфак” оешмасы үз эшен әлеге юнәлештә оештыра. Без ата-аналар, балалар бакчалары, мәктәпләр белән хезмәттәшлек итәбез”, – диде семинарда чыгыш ясаган Рима Гомәр кызы.
Нет комментариев