Сак булыгыз: бруцеллез!
Җәмгыять

Сак булыгыз: бруцеллез!

Район хакимиятендә Татарстанда бруцеллез чире табылу белән бәйле саклык чаралары турында фикер алыштылар.

фото: Татар-информ

Әтнә районының бер хуҗалы­гындагы тер­лекләрдә куркыныч йогышлы чир барлыгы ачыкланган. Хәзерге вакытка 5 меңнән артык терлекне юк итү турында карар ­чыгарылган.

Бруцеллезны хайваннар өчен дә, кеше өчен дә хроник төрдәге иң йогышлы авырулар рәтенә кертәләр. Чирне 6 төр бактерия китереп чыгара, аларның барысы да түбән температурага чыдам, кайнар суда бик тиз юкка чыга. 

Бруцеллез, үрчем исәбен киметеп, малларның продуктлылыгын бетереп, терлекчелек хуҗалыкларына икътисади зур зыян китерә. 

Район башлыгы Рәмис Сафиуллов предприя­тие­ләр һәм оешмалар, КФХ җитәкчеләре, авыл җирлекләре башлыклары белән үткәрелгән ки­ңәшмәдә Тәтеш районы территориясендә чир таралуга юл куймау өчен барлык профилактик чараларны куллану бурычын куйды. Барлык терлекчелек һәм кошчылык хуҗалыкларына ябык рәвештә асрау тәрти­бенә күчү, терлекчелек комплекслары (фермалар) территорияләрен чит кешеләрнең, транспорт­ларның һәм кыргый хай­ваннарның үтеп ке­рү­ен­нән саклау, анда кер­гәндә һәм аннан чыкканда дезинфекцияләү урыннары оештыру, хай­ваннарны район терри­ториясенә кертүне һәм чыгаруны дәүләт ветеринария хезмәте белән килешенү.

Тәтеш районы башкарма комитеты җитәкчесе Альберт Гасимов рәисле­гендәге гадәттән тыш хәлләр комиссия­се утырышында Тәтеш ветеринария оешмасы начальнигы Рәмис Гарипов эпизоотик хәл турында сөйләде.

– Бактерияләр туфракта, суда, азыкта, тирестә була ала, аннан хайваннарның ашказаны-эчәк трактына эләгә һәм лайлалы тышчаларга урнашып кала. Инфекция сулыш юллары, лайлалы тышчалар аркылы да йога. Инфекцияле тирес, сидек белән эш иткәндә хәтта тире дә зарарланырга мөмкин. Бруцелла бүлеп чыгаручы авыру хайваннар  – сарык­лар, кәҗәләр, мөгезле эре терлекләр, дуңгызлар – кеше өчен бруцеллез инфекциясенең төп чыганаклары булып торалар. Кан суыручы бөҗәкләр, кимерүчеләр, йорт мәче­ләре, этләр, кыргый хайваннар да чир йөртүчеләр булырга мөмкиннәр, – дип хәбәр итте Тәтешнең баш ветеринария табибы. – Инфекция бәйләнешкә керү юлы, яки тиешенчә термик эшкәртү узмаган терлек итеннән ясалган азык-төлекләр аркылы барлыкка килә. Тук­ланыр өчен кайнатылмаган сөт һәм тиешенчә термик эшкәртелмәгән ит ризыклары куллану катгый тые­ла, чөнки бактерияләр фәкать югары температурада гына юкка чыга. Чир терлекләрдән терлекләргә күчә, ләкин кешедән кеше­гә – юк. Авыл җирлекләре башлыкларына, район хал­кына хайваннарны һәм кошларны рөхсәтсез сату очраклары ачыкланганда, хайваннарның кинәт авырып китүе һәм үлеме яки бер үк вакытта берничә хайван авырып киткән очракта район дәүләт ветеринария оешмасына хәбәр итәргә кирәк.

Альберт Гасимов, нәтиҗә ясап, терлекләрнең баш санын куркыныч чирдән саклау буенча ашыгыч рәвештә чаралар күрергә, профилактика мәсьәләләренә җаваплы карарга кирәк дип билгеләп үтте.  

– Бу очракта тулы изоляция: территорияләрне коймалап алырга, терлекчелек комплекслары хез­мәткәрләре өчен санитар керү-чыгу пунктлары оештырырга, биналарны даими рәвеш­тә дератизацияләргә ки­рәк. Шәхси йортларда терлекләр асрауның ветеринария-санитария ка­гыйдәләрен үтәүнең җа­ваплылыгын арттырырга. Хайваннар, азыклар сатып алу – барысы да ветеринария оешмасының катгый тикшерүе астында булырга тиеш, – дип ассызыклады Альберт Әсхәт улы.  


Нет комментариев