Татарстан Дәүләт Советына 438 кандидат тавыш бирүгә куелачак

(Тәтеш, 9 август, "Тәтеш таңнары").  Татарстан үзәк сайлау комиссиясе VI ­чакырылыш ­Татарстан Республикасы Дәү­ләт Советына депутатлыкка сайлана­чак сәяси партияләрдән кандидатларның һәм бер мандатлы кандидатларның респуб­лика исемлеген теркәүне тәмамлады.

Сайлауга 7 сәяси партия – “Бердәм Россия” сәяси партия­ләренең төбәк бүлекләре, КПРФ, “Гадел Россия”, ЛДПР, “Россия коммунистлары”, “Үсеш партиясе” һәм “Социаль гаделлек өчен пенсионерларның Россия партиясе” ­кертелде.

Тулаем алганда, партия исемлекләре буенча VI чакырылыш Татарстан Дәүләт Советына 202 кандидат тавыш бирүгә куелачак. Бердәм рес­публика сайлау округы буенча барыннан күбрәк кандидатларны “Бердәм Россия” (партия исемлегендә 55 кеше) һәм “Гадел Россия” (46 кандидат) тәкъдим итте. ЛДПР исемлегендә – 40 кандидат, КПРФта – 30 кандидат. “Россия коммунистлары” партиясе исемлеге үз эченә 9 кешене сыйдырган, “Үсеш партия­се” – 12не, “Россия пенсионерлар партия­се” – 10 кешене.

Дүрт сайлау берләшмәсенең теркәү гаризасы кире кагылды. “Родина” партия­се һәм “Игелекле эшләр, балаларны, хатын-кызларны, азатлыкны, табигать һәм пенсионерларны яклау, хайваннарны җәберләүгә каршы партия” документларны, шул исәптән исемлекне тәкъдим итү өчен сайлаучылар имзасын вакытында тапшыр­мады. “Россия ветераннар партиясе” һәм “Россия гомумхалык берләшүе” партия­ләренең гаризалары сайлау­чыларның  имзалары арасыннан тикшерү өчен сайлап алынган имзаларның 10 проценттан артыгы дөреслеккә туры килмәве һәм гамәлдә булмавы аркасында кире кагылды.

Бер мандатлы округларда 236 кандидат теркәлде, алар арасында 57се – үз-үзләрен тәкъдим итүчеләр. “Бердәм ­Россия”дән 41 кандидат теркәлде, “Гадел Россия”дән – 42 кандидат, ЛДПРдан – 43, КПРФтан – 46 кандидат. “Россия коммунистлары” бер мандатлы сайлау округ­ларында үзләренең 5 кандидатны тәкъдим итте, ­“Яблоко” һәм “Үсеш партия­се” – берәр кандидатны. 

Алтынчы чакырылыш Татарстан Дәүләт Советына сайлау­лар 8 сентябрьдә узачак. Сайлауларда 100 депутат мандаты билгеләнәчәк: 50се – партия исемлекләре буенча,  тагын 50се – бер мандатлы сайлау округлары буенча.

Материал ТР Үзәк сайлау комиссиясе матбугат хезмәте тарафыннан тәкъдим ителде