23 февраль – Ватанны саклаучылар көне.
(Тәтеш, 23 февраль, “Тәтеш таңнары”).
Тәлгать Хәкимов, Нармонка авылы җирлеге башлыгы:
– Ерак Көнчыгышта 1983-1985 елларда тимер юл гаскәрләрендә хезмәт иттем. Без зур күперләр, юллар, әһәмиятле объектлар сакладык. Мин хезмәт иткән елларда Байкал-Амур магистрале буйлап поездлар хәрәкәтенең рәсми рәвештә ачылуы тарихи вакыйга булды, октябрьдә Тында шәһәрендә митинг узды. Юлны тантаналы рәвештә ачу чын бәйрәм булды, барысы да ихлас күңелдән шатландылар, хәтта бәхеттән еладылар. Тимер юлга күп халык – хәрби хезмәткәрләр, гражданнар, бөтен илдән кешеләр җыелды. Мисалга, Постышево станциясе янындагы Березовка поселогының төп халкы Волгоград кешеләреннән тора иде.
Безнең часть Амур ярында урнашкан иде, елга үзенең тиз агымы һәм үтә күренмәлелеге белән таң калдырды, анда метр ярымга кадәрге пошилар да бар, кайчагында безнең янга аюлар да адашып килеп керәләр иде.
Нет комментариев