Тәтешлеләр акча һәм төзелеш инструментларыннан колак какканнар

(Тәтеш, 7 август, "Тәтеш таннары").

Июль башында Россия Эчке эшләр ми­нистр­лыгының Тәтеш районы бүлегенә Питомникта пилорама янында тукталган ике машинаның ян пыяласы ватылганы һәм акча урланганы турында берьюлы ике гариза килә. Полиция хезмәткәрләре элек хөкем ителгән Югары Тархан кешесенең исерек хәлдә бер автомашинаның алгы як тәрәзәләрен ватуы, уң як ишегенә зыян китерүе һәм, матди кыйммәтләрне тапмыйча, җинаять кылу гамәлләрен дәвам итеп, шунда ук туктаган башка машинаның алгы як тәрәзәсен ватуы ачык­ланган. Аннан 85 мең сум акча урлаган һәм җинаять урыныннан качкан. Тикшерү-оператив төркем тарафыннан шикләнелүче билгеләнгән, 75 мең сум акча алынган.
Тәтештә яшәүче бер ир-ат полициягә алдакчылык юлы белән аның исеменә кредит рәсмиләштергән һәм ике банк картасыннан 66 мең сумлык акча алган кешеләрне җаваплылыкка тарту турында гариза белән мөрәҗәгать иткән.
Россия Эчке эшләр министрлыгының Тәтеш районы бүлегенә шәһәр кешесеннән билгесез затны җаваплылыкка тарту турында гариза килгән, ул Интернет челтәрендә язышу барышында аны ялгыш юлга керткән һәм компьютер уенында откан 11 000 сум күләмендәге акчасын урлаган.
12 июль төне якынлашканда, полициягә Тәтештә яшәүче бер ир шалтырата һәм Көньяк урамы буенча 22нче йорт янында билгесез егетләр ызгыш барышында әлеге йортта яшәүче ханымның туктаган машинасының алгы пыяласын ватуын хәбәр итә. Хатын-кызга 53 000 сумлык матди зыян китерелгән. Кайнар эздән шикләнелүче тоткарлана.
Пролей-Каша авылында торак йортта янгын сүндергән вакытта Югары Тарханда яшәүченең мәете табылган. Суд-медицина экспертизасы үткәргәндә һәлак булган кешенең тәнендә кадалган-киселгән яралары табылган. Җинаять эше кузгатылган, шикләнелүче билгеләнгән.
Полициягә Тәтештә яшәүче бер кеше, Тәтеш авыл хуҗалыгы техникумының беренче катында урнашкан ярдәмче бинага кереп, 30 000 сумга якын төзелеш инс­трументларын урлаган билгесез затларны җинаять җаваплылыгына тарту турында гариза белән мөрәҗәгать иткән.
Россия Эчке эшләр министрлыгының Тәтеш районы бүлеге хезмәткәрләре тарафыннан Ильинское авылында яшәүче бер ханымның аның йортына билгесез затларның үтеп керү факты буенча гаризасы теркәлгән. Металл эшләнмәләр һәм көнкүреш әйберләре урланган.

фото: архив/Авангард