Тәтешлеләр уңыш өчен нигез булдыралар

(Тәтеш, 17 ноябрь, “Тәтеш таңнары”, Мария Храмова). Минераль ашламалар – авыл хуҗалыгы культураларыннан югары уңыш алуның мөһим факторларының берсе, алар уңдырышлылыкны арттырып кына калмыйча, аның сыйфатын да яхшырталар, үсемлекләрдә шикәр һәм аксым микъдарын арттыралар, шулай ук биологик актив матдәләр корылыкка нәтиҗәле каршы торырга ярдәм итәләр. Шулай итеп, җитәрлек тукланганда уңыш берәмлеген формалаштыру өчен дым микъдары ике тапкыр кимрәк кирәк.

2022 ел уңышы өчен район башлыгы Рәмис Сафиуллов район хуҗалыкларында бер гектарга 140 килограммнан да ким булмаган тәэсир итүчән матдә кертүне бурыч итеп куя. 

Бүгенге көндә бер гектарга исәпләгәндә иң күп ашлама “Колос”та тупланган – 1200 тонна аммиак селитрасы, 450 тонна диаммофоска, бу тәэсир итүчән матдәдә 122 килограмм тәшкил итә. Икенче күрсәткеч “Бакырчы” авыл хуҗалыгы предприятиесендә – 800 тонна аммиак селитрасы, тәэсир итүчән матдәдә 82 килограмм, өченче урында “АгроСоюз” – 420 тонна селитра, тәэсир итүчән матдәдә 60 ­килограмм.

Район авыл хуҗалыгы һәм азык-төлек идарәсе начальнигы Ирек Садриев билгеләп үткәнчә, ашлама җыю темплары түбән булган авыл хуҗалыгы предприятиеләре җи­тәкчеләренә ашыгырга кирәк, чөнки бәяләр арта. 

– Агымдагы елның гыйнварында бер тонна аммиак селитрасы 15,4 мең сум торса, хәзерге бәясе – 29 мең сум. Катлаулы ашламалар буенча да шундый ук хәл, – дип басым ясады ул. – Билгеле булганча, ашламалар туплау һәм кертү югары һәм сыйфатлы уңыш алуның нигезе булып тора. Республика бюджеты акчаларыннан бер гектар чәчүлеккә 40 килограммнан да ким булмаган тәэсир итүчән матдә сатып алганда һәм туп­лаганда авыл хуҗалыгы оешмаларын стимуллаштыру киләсе елга да саклана. Финанслау 2022 ел башында башланачак. Субсидияләр, үз чиратында, минераль ашламалар сатып алуга китәргә тиеш.