Тәтеш районының “Ак калфак” татар хатын-кызлары иҗтимагый оешмасы җитәкчесе Рима Сафиуллова һәм бүлекчәнең сәркәтибе Сәлимә Арсланова Чувашиядә узган күчмә утырышта булып кайттылар.
(Тәтеш, 10 ноябрь, “Тәтеш таңнары”).
– Әлеге чарада Татарстанның һәм Россиянең 12 төбәгеннән йөзләп вәкил катнашты. Күчмә утырыш барышында без Чувашиянең Комсомол һәм Батыр районнарына караган дүрт татар авылында булдык, – дип уртаклашты Рима Гомәр кызы (рәсемдә уңнан өченче). – Очрашу Комсомол районының Тукай авылыннан башланып китте. Әлеге төзек, зур авылның һәрбер йортында диярлек өч буын: каенана, каената, уллары һәм киленнәре, оныклары бергәләп яшиләр. Әлегә кадәр шулай булган, бүгенгә кадәр шулай дәвам итә. Мәхәлләне тутырып җыелган ак яулыклы әбиләр, көләч йөзле ханымнар белән аралашкач, әби-бабаларыбыздан калган яшәү рәвешенең үз-үзен аклавына инанасың. Бу төп нигезне саклау, балаларны әби-бабай җылысында үстереп, дин һәм әхлак, эшкә өйрәтеп үстерү тәрбиясен бирү кебек күп мәсьәләләрне уңай хәл итә. Моны без районыбызда үткәрелгән чараларда да чагылдырырга тырышабыз һәм үзебезнең эшчәнлекне алып барганда, мәктәпләрдә, балалар бакчаларында, мәдәният учакларында булсынмы, шул хакта еш искә төшерәбез. Ә инде күчмә утырыш кебек мондый очрашулар бик мөһим, чөнки уртак эш – күп нәрсәләргә өйрәтә.
Сәлимә Сәлах кызы (рәсемдә сулдан беренче) уртаклашканча, Тукай авылында яшәүчеләр дә берничә буынның бер түбә астында яшәү рәвешен нәсел дәвамчыларына да тапшыруны үзләренең мөһим бурычлары дип саныйлар. Биредә алар бик күп матур күренешләрне карап хозурланганнар. Ата-аналарның, әби-бабайларның мәктәпкә килеп балаларны борынгы кул эшләренә өйрәтүләренә сокланып кайтканнар. Алар шулай ук Шыгырдан авылында мәчеткә, мәдрәсәгә барганнар, милләттәшләребезнең эшләрен, тормыш-көнкүрешләрен, яшәү рәвешен үз күзләре белән күргәннәр. Әлеге күчмә утырышта үрнәк алырдай мизгелләр шактый булган.
Тәтеш районындагы “Ак калфак” иҗтимагый оешмасы да гореф-гадәтләрне саклау һәм татар халкының йолаларын яшь буынга тапшырып калдыру, балаларга әдәп-әхлак һәм дини тәрбия бирү юнәлешендә эшчәнлек алып бара.
фотоны Сәлимә Арсланова тәкүдим итте
Нет комментариев