Үз вазифасын яхшы башкара

(Тәтеш, 16 октябрь, “Тәтеш таңнары”).
 Бу көнне без юл төзелешендәгеләргә, иксез-чиксез илебезнең төрле почмаклары ­арасында имин юллар булдыручыларның барысына да, хезмәт сөю­чәнлекләре, үз эшләре­нең осталары булганнары өчен хөрмәт белдерәбез. 

Тәтешнең юл-ремонт төзелеше идарәсендә авыр йөк машинасы шоферы булып эшләүче Сергей Борисов  үзенең хезмәтенә осталыгыннан да, шулай ук күңел җылысыннан да өлеш кертә. Буа районы Яшевка авылында туган ир-ат мәктәпне тә­мамлагач, шофер һәм тракторчы булырга укыган. Аңа армиядә танкист та булырга туры килгән. Сергей Геннадь­евич Германиядә хезмәт иткән еллары һәм андагы дуслары турында җылы итеп искә ала. Хезмәтен тутыргач, Тәтешкә кайткан һәм танк рычагын рульгә алыштырган. Районның җә­мә­гать туклануы оешмасында, урман хуҗалыгында шофер булып эшләгән, 2000 елда юл-ремонт төзелеше идарәсенә урнашкан. Ул чакта Тәтештә, Олы Тормыда һәм Урюмда эшләгән асфальт заводларына гравий ташыган. Аннан – юл участокларына асфальт илткән. 2011 елда аңа заманча юл машинасын ышанып тапшырганнар.

– Уңайлылыкта эшли башладым. Әлеге иномаркада җилләткеч тә бар, җылы да, – дип сөйли Сергей Геннадьевич. – Әлегә кадәр төзек хәлдә хезмәт күрсәтә. Кышын тәүлекнең теләсә кайсы вакытында өч сменада 8әр сәгать эшлибез, җиңел түгел, әлбәттә. Ә җәен эш көне иртәнге 7дә башлана һәм билгеләнгән йөкләмәне үтәмичә торып тәмамланмый. Җәй айларында, һава торышы яхшы булганда, безгә күп нәрсәләрне эшләп өлгерергә кирәк. Урамнарның тагын да матурлана баруы, юллар ремонтлануы сөендерә, аларның барысы да бит мөһим. Мисалга, элек Лаптевкага керә дә, аннан чыгып та булмый иде, ә хәзер анда юллар яхшы. Әле тагын Никифоровка һәм Ямбактыда яшәүчеләрнең дә шундый юллары булсын иде. Тора-бара ясаячакбыз!      

– Коллектив – уңышлы эшләүнең мөһим факторы, – ди ышанычлы итеп Тәтеш­нең юл-ремонт төзе­леше идарәсе начальнигы Иршат Әхтәмов. – Бездә 53 кеше эшли, бик дуслар, үз эшенең тәҗрибәле белгечләре. Барысын да бер сыйфат – үз һөнәрләрен ярату берләштерә. Үзләренең вазифаларын бик яхшы башкаралар, юллардагы хәрәкәт уңайлы, җайлы һәм имин булсын өчен барысын да эшлиләр.  

Безнең филиалда 28 тех­ни­ка бар. Без ремонтлау, төзелеш, автомобиль юллары челтәрләренә хез­мәт күрсәтү белән шө­гыль­ләнәбез. Безнең районда автоюлларның озын­­лыгы 315 чакрымны тәш­кил итә, анда без авто­транс­портларның ел әйлә­нәсе өзеклекләрсез хәрәкәт итүен тәэмин итәргә тырышабыз. 

Быел рес­публика программасын гамәлгә ашыру кысаларында биш урам-юл челтәре: Горький, Калинин, Табиб Соколовлар урамнары, һәм Кирпеч тыкрыгы участогы ремонтланды. Болардан тыш, Килдештә, Апас – Тәтеш учас­тогында эшләр башкарылды. Хәзерге вакытта Кошки-Новотимбаево – Рус Кищагы юлларын ясау бара, ул Тәтеш һәм Буа районнарын тоташтыра. Юл торышының мониторингы даими үтәлә. Эш бик күп, аны һәрчак намуслы һәм җаваплы итеп башкарырга тырышабыз. Районыбызның һәм һәрбер торак пунктның социаль-икътисади үсеше  юлчыларның үз хезмәт­ләрен никадәр сыйфатлы эшләвенә бәйле.