Сергей Тегулев истәлеген хөрмәтләп аллеягә исем бирелгән

(Тәтеш, 26 сентябрь, “Тәтеш таңнары”). 

Сергей Александрович 1948 елның 1 декабрендә Куйбышев районы Бугровка авылында күп балалы гаиләдә туган. Сигезьеллык мәктәпне тәмамлаганнан соң, Тәтеш авыл хуҗалыгы техникумына агрономия бү­легенә укырга кергән. Ул булачак хатыны Надежда белән Тәтештә танышкан. Техникумны тәмамлагач, хезмәт эшчәнлеген 1969 елда туган районындагы Антоновка авылында башлап җибәргән. Сергей Александрович вакытлар узу белән Куйбышев орлыкчылык инспекциясенә күчерелгән. 

Сергей һәм Надежда 1971 елның февралендә никахларын теркәгәннәр һәм яшьләр шуннан бирле бер дә аерылышмаганнар. Тегулевлар гаиләсе 1972 елда Тәтештә яши башлаган. Ире башта Тәтеш иминият компаниясендә инспектор булып эшләгән, ә 1973 елда Буа электр челтәрләренең Тәтеш РЭЧында челтәр учас­тогы мастеры булган. Сергей Александрович үзен җаваплы, сәләтле, намуслы хезмәткәр итеп таныткан, 1978 елда аны өлкән мастер вазифасына күчергәннәр, ә ун елдан соң ул Тәтеш районының электр белән тәэмин итү идарәсе җитәкчесе итеп билгеләнгән.
Сергей Тегулев эшләгән еллары эчендә үзен белемле белгеч һәм алга киткән җитәкче итеп күрсәткән. Аңа теләсә кайсы мәсьәләне хәл итә белү һәм шул ук вакытта кабул ителә торган карарларны тиз итеп башкарып чыгу кебек сыйфатлар хас булган. 

Предприятиенең матди-техник базасы даими рәвештә яхшырган һәм яңартылган. Җитәкчегә энергетиклар­ның өйрәнү күнекмәләре һәм ярышлар үтә торган күнекмәләр өйрәтү полигонын һәм укыту-көнкүреш корпусын карап тоту буенча җаваплылык йөкләнгән булган. Полигонның шул вакытларның иң югары таләпләренә җавап бирүе билгеләп үтелгән.

Сергей Тегулев хезмәт­кәрләрнең һөнәри әзерлегенә, аларның квалификациясен күтәрүгә зур игътибар бүлеп биргән, шулай ук коллективта һөнәрдә буыннар дәвамлылыгы, остазлык хупланган. Җитәкче ­шулай ук хезмәткәрләрне ­торак белән тәэмин итү белән дә шөгыльләнгән, йортлар тө­зү алып барылган, Энер­гетикларның тулы бер урамы барлыкка килгән. 
Сергей Тегулев 2009 елның 24 августында вафат булган.

Надежда Тегулева, хатыны:
– Без 38 ел бергә тату гомер кичердек. Ул мәрхәмәтле, игътибарлы, гыйлемле кеше иде. Чын гаилә башлыгы, хуҗалыкчыл, барысын да белә – балта белән дә эшләде, эретеп ябыштыру белән дә шөгыльләнде, мич тә өйде, һәр нәрсәдә пөхтә иде. Кызларыма һәм миңа наз, кайгыртучанлык күрсәтте. Күп вакытын эшкә багышласа да – теләсә кайсы вакытта һәм теләсә нинди һава торышында объектка китеп барыр иде – безнең белән үткәргән вакытларын һәрвакыт кадерләде. Тәтеш РЭЧында үзем дә 35 ел эшләдем, производствода ирем белән безнең бары тик эшлекле мөнәсәбәтләр генә булды. Аның каравы коллективтагы бәйрәм көннәрен без гаиләләребез белән үткәрдек, җылы, гаилә мохите була иде. 
Хәзерге җитәкчелекнең бүгенге көндә дә безне, ветераннарны, кайгыртуы бик сөендерә, ә Сергей Александрович истәлегенә полигонда Тегулев аллеясе бар. Ирем яхшы гаилә башлыгы һәм җитәкче булды. 

Людмила Тегулева, кызы: 
– Минем әти – иң әйбәте. Мин аның белән кибеткә йөрергә яраттым, сатып алу әти белән безнең карамакта булды. Мин үземне шундый кирәкле итеп хис иттем, ә аннары әти миңа тәмле әйбер сатып ала иде. Әле тагын ул гөмбәләрне яхшы белде, гаилә белән урманга йөрдек, бигрәк тә көзге баллы гөмбәләрне һәм гөреҗдәләрне җыярга яратты. Әтигә йорттагы ремонт эшләрендә бик теләп ярдәм иттем, ул беркайчан да тавыш күтәрмәде, барысын да аңлата иде. Аннары, РЭЧта эшли башлагач, ул һөнәремдә остазым булды, зирәк һәм кирәкле киңәшләрен бирде. 
Әти – тормышымда бик мөһим кеше булды, миңа ул бик тә җитми, аны якты хатирәләр белән искә алам, ул һәрчак минем йөрәгемдә.

Олег Рафаилов, хезмәттәше: 
– Мин Сергей Александрович белән 1995 елдан алып эшләдем. Ул кырыс, гадел җитәкче иде, коллективта аны хөрмәт иттеләр. Хезмәткәрләргә  ул аңлап карады һәм һәр нәрсәдә ярдәм итте, итәгатьле кеше иде.